Աֆրիկայի հյուսիսում գտնվող Իսպանիայի անկլավ միգրանտների զանգվածային ներհոսքի հետևանքով զոհերի թիվը հասել է 72-ի

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Իսպանիայի Սեուտա անկլավ Մարոկկոյից միգրանտների զանգվածային ներհոսքի հետևանքով զոհվածների թիվը հասել է առնվազն 72-ի այն բանից հետո, երբ Աֆրիկայի հյուսիսային ափերին հայտնաբերվել է ևս հինգ մարդու մարմին։ Այս մասին հայտնում է Reuters-ը։

Զոհերի այս թիվը զգալիորեն գերազանցում է այն տվյալները, որոնք օգոստոսի 2-ին հրապարակել էին Մարոկկոյի իշխանությունները։

Ավելի քան 50 հազար մարդ ցամաքով և ծովով հատել է Սեուտայի սահմանը՝ աննախադեպ ներհոսքի ընթացքում, որը սկսվել էր հուլիսի 30-ին։ Սեուտան Եվրամիության՝ Աֆրիկայի հետ ունեցած ցամաքային ընդամենը երկու սահմաններից մեկն է, և տեղի ունեցածը լուրջ մտահոգություն է առաջացրել ամբողջ ԵՄ-ում։ Իսպանական իշխանությունների տվյալներով՝ շուրջ 48 հազար մարդ 48 ժամվա ընթացքում վերադարձել է Մարոկկո, իսկ հանգստյան օրերին վերադարձածների թիվն աճել է։

Սեուտայում Իսպանիայի կառավարության ներկայացուցիչ Միգել Անխել Պերեսը լրագրողներին հայտնել է, որ բացի 72 զոհերից առողջապահական ծառայությունները բուժօգնություն են ցուցաբերել ավելի քան 1000 մարդու։ Նրա խոսքով՝ անկլավում իրավիճակը զգալիորեն բարելավվել է, սակայն բնականոն կյանքն ամբողջությամբ վերականգնելու համար դեռ աշխատանք կա անելու։

Միգրանտներից մի մասը խեղդվել է, իսկ մյուսները զոհվել են սահմանային ցանկապատը հաղթահարելու փորձերի ընթացքում առաջացած հրմշտոցի հետևանքով։ Նրանցից շատերը լքել են Մարոկկոն տնտեսական ծանր պայմանների պատճառով։

Մարոկկոյի ներքին գործերի նախարարությունն օգոստոսի 2-ին տարածած հայտարարության մեջ նշել էր, որ զոհվել է 11 մարդ, հիմնականում՝ Իսպանիայի տարածք անցնելու փորձի ժամանակ խեղդվելու հետևանքով։ Գերատեսչությունը հավելել էր, որ ստուգում է սահմանի մյուս կողմից տարածվող տեղեկությունները զոհերի վերաբերյալ։

Մարոկկոյի իշխանությունների գնահատմամբ՝ սահմանը հատելու փորձին մասնակցել է շուրջ 40 հազար մարդ, ինչը զգալիորեն պակաս է իսպանական կողմի ներկայացրած թվից։ Միաժամանակ նշվում է, որ ևս 1135 մարդու թույլ չի տրվել մուտք գործել Իսպանիայի մեկ այլ անկլավ՝ Մելիլյա։

Հայտարարության մեջ վերահաստատվում է, որ Մարոկկոն հավատարիմ է անօրինական միգրացիայի դեմ պայքարին։

Հետևեք մեզ՝ այստեղ