Բժիշկը զգուշացրել է ցածր յուղայնությամբ մթերքների թաքնված վտանգների մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«0% յուղ» պիտակով մթերքները կարող են այնքան առողջարար չլինել, որքան ընդունված է կարծել։ Որոշ դեպքերում դրանք նույնիսկ կարող են մեծացնել սրտանոթային հիվանդությունների առաջացման ռիսկը։ Սրտաբան Օլիվեր Գուտմանը սա բացատրել է «Daily Mail»-ին տված հարցազրույցում։

Մասնագետի խոսքով՝ ճարպը հեռացնելիս մթերքները հաճախ կորցնում են իրենց համը և ծանոթ կառուցվածքը։ Սպառողների համար դրանք ավելի գրավիչ դարձնելու համար արտադրողները հաճախ ավելացնում են շաքար, աղ, համեմունքներ և տարբեր խտացուցիչներ կամ կայունացուցիչներ։

Մասնավորապես, ցածր յուղայնությամբ մածունները (յոգուրտները), աղանդերը և սոուսները կարող են պարունակել մոդիֆիկացված օսլա, մալտոդեքստրին, կարագենան, քսանթանային խեժ կամ գուարի խեժ։ Այս բաղադրիչները նպաստում են մթերքը ավելի խիտ և կրեմոտ դարձնելուն, բայց ավելացված շաքարի հետ համատեղելիս դրանք կարող են մեծացնել կալորիականությունը և նվազեցնել սննդային արժեքը։

Սրտաբանը նշել է, որ ավելացված շաքարի ավելցուկը նպաստում է քաշի ավելացմանը, ինսուլինային դիմադրությանը և 2-րդ տիպի շաքարախտին, մինչդեռ աղի ավելցուկ օգտագործումը կապված է արյան բարձր ճնշման հետ, որը սրտի կաթվածի և ինսուլտի հիմնական ռիսկի գործոն է։

Գուտմանի խոսքով՝ ճարպերի լիակատար բացառումը խորհուրդ չի տրվում: Ընկույզի, ձկան, ավոկադոյի և ձիթապտղի յուղի մեջ առկա չհագեցած ճարպերը կարևոր են օրգանիզմի համար և կարող են նվազեցնել սրտանոթային հիվանդությունների առաջացման ռիսկը: Հետևաբար, սննդամթերք ընտրելիս բժիշկը խորհուրդ է տալիս ուշադրություն դարձնել ոչ միայն «0% ճարպ» պիտակին, այլև սննդային արժեքի ամբողջական տեղեկատվությանը և ավելացված շաքարի ու աղի պարունակությանը:

Մասնագետը խորհուրդ է տվել խուսափել ուշ ընթրիքներից և անմիջապես քնելուց առաջ ուտելուց, քանի որ այս սովորությունը նույնպես կարող է բացասաբար ազդել նյութափոխանակության և սրտի առողջության վրա:

Հետևեք մեզ՝ այստեղ