Իտալացի գործարարը հայտնվել է քննության տակ՝ հետաքննող լրագրող Սիգֆրիդո Ռանուչիի տան մոտ տեղի ունեցած պայթյունի գործով

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Իտալիայի դատախազությունը քննություն է սկսել գործարար և նախկին լրագրող Վալտեր Լավիտոլայի նկատմամբ, որին կասկածում են հայտնի հետաքննող լրագրող Սիգֆրիդո Ռանուչիի տան մոտ տեղի ունեցած պայթյունը կազմակերպելու մեջ, հաղորդում է The Guardian-ը։

Լավիտոլան, քննության տվյալներով, կարող էր լինել Rai պետական հեռուստաալիքի Report ծրագրի հաղորդավարի դեմ հարձակման կազմակերպիչը։ Նրան առաջադրվել են կասկածներ հնարավոր զանգվածային սպանությանն առնչվող հանցագործության փորձի կատարման մեջ։

Քննությունը սկսվել է, երբ անցյալ շաբաթ ոստիկանությունը ձերբակալել է չորս հոգու, ովքեր, ինչպես պնդում են, գործել են Լավիտոլայի հանձնարարությամբ և կարող էին առնչություն ունենալ անցյալ տարվա հոկտեմբերին տեղի ունեցած պայթյունին։

Ինքնաշեն, բայց հզոր պայթուցիկ սարքը գործի է դրվել Հռոմի մոտակա բնակավայրերից մեկում գտնվող Ռանուչիի տան մոտ։ Պայթյունի հետևանքով գրեթե ամբողջությամբ ոչնչացվել են լրագրողի և նրա դստեր ավտոմեքենաները։ Ոչ ոք չի տուժել։ Պայթյունը տեղի է ունեցել ուշ երեկոյան՝ այն բանից կարճ ժամանակ անց, երբ իր հասցեին հնչող սպառնալիքների պատճառով արդեն երկար տարիներ ոստիկանության պաշտպանության տակ գտնվող Ռանուչին վերադարձել էր տուն։

Լրագրողը հայտարարել է, որ ցնցված է Լավիտոլայի հնարավոր ներգրավվածությունից, որին անվանում էր «իսկական ընկեր» և ում հետ, իր խոսքերով, շփվում էր գրեթե ամեն օր։

Քննիչները դեռևս չեն պարզել հարձակման ստույգ դրդապատճառը։ Սակայն, ըստ դատախազության վարկածի, Լավիտոլան հանձնարարել է մարդիկ գտնել պայթուցիկ սարքը տեղադրելու համար և, ենթադրաբար, նրանց մի քանի հազար եվրո է վճարել։

Ռանուչին և Լավիտոլան ծանոթացել են 2019 թվականին՝ այն լրագրողական հետաքննությունից հետո, որը «Report»-ի հաղորդավարը նվիրել էր գործարարի գործունեությանը։ Անցյալում Լավիտոլան ֆիգուրացրել է մի քանի դատական գործընթացներում, այդ թվում՝ դատապարտվել է Իտալիայի նախկին վարչապետ Սիլվիո Բեռլուսկոնիից շորթում կատարելու գործով։

Ռանուչին հայտարարել է, որ երբեք չի թաքցրել իր ընկերությունը Լավիտոլայի հետ, ով այժմ զբաղվում է բիզնեսով և Հռոմում ռեստորան ունի, որտեղ լրագրողը հաճախ էր լինում։

«Նա հուզված էր։ Ես նույնպես շատ զարմացած էի քննության նման շրջադարձից»,- պատմել է Ռանուչին Corriere della Sera պարբերականին։

Հարձակումից հետո լրագրողն ասում էր, որ այնքան մեծ քանակությամբ սպառնալիքներ է ստացել, որ դրանց աղբյուրը պարզելը չափազանց դժվար կլինի։ Սակայն նա տեղի ունեցածն անվանել է «մտահոգիչ նոր մակարդակ», քանի որ հարձակումը տեղի է ունեցել «ուղիղ իր տան դիմաց»։ Ավելի վաղ՝ 2024 թվականին, Ռանուչիի տան մոտ նաև փամփուշտներ էին հայտնաբերվել։

Report հաղորդման մեջ Ռանուչիի հետաքննությունները նվիրված են կոռուպցիայի և կազմակերպված հանցավորության ենթադրյալ դեպքերին։ Հաղորդումները հաճախ շոշափում են պետական նախարարների գործունեությունը, որոնցից մի քանիսը հայցեր են ներկայացրել ծրագրի դեմ։ Լրագրողն ինքը նույնպես հանդես է եկել պետական Rai հեռուստաալիքի վրա Ջորջիա Մելոնիի կառավարության ենթադրյալ քաղաքական ազդեցության քննադատությամբ։

Ռանուչին նաև իտալական մաֆիայի մասին գրքի հեղինակ է։ 2021 թվականին նա պատմում էր, որ մի նախկին դատապարտյալ հայտնել է իրեն, թե գրքի հրատարակումից հետո մաֆիոզ կառույցները իբր նրա սպանության «հրաման են տվել», սակայն մահափորձը կանխվել է։

Հետևեք մեզ՝ այստեղ