Լիբանանում ՀՀ դեսպանը գրող Սարգիս Կիրակոսյանին է հանձնել «Մովսես Խորենացի» շքանշան

Լիբանանում ՀՀ դեսպանատանը հունիսի 9-ին դեսպան Աշոտ Քոչարյանը բանաստեղծ, մտավորական, գրող Սարգիս Կիրակոսյանին է հանձնել իրեն շնորհված «Մովսես Խորենացի» շքանշանը: Պարգևատրումնը կատարվել է ՀՀ Նախագահ Սերժ Սարգսյանի մայիսի 28-ի հրամանագրով: Այս մասին տեղեկացնում է «Ազդակ» օրաթերթը: Դեսպան Քոչարյանը հանդես է եկել ողջույնի խոսքով և ներկայացրել Սարգիս Կիրակոսյանի կենսագրությունը՝ ավելացնելով, թե հատկանշական է, որ պարգևատրումը տեղի է ունենում Հայոց ցեղասպանության 100-րդ տարելիցին, որն առիթ հանդիսացավ վերահստատելու հայության համախմբվածությունը, միասնականությունն ու կազմակերպվածությունը:

Ապա իր խոսքով հանդես է եկել «Ազդակի» տնօրեն և գլխավոր խմբագիր Շահան Գանտահարյանը՝ նշելով, որ Հայաստանի Նախագահի հրամանագրով շքանշան շնորհվել է հայրենիք-սփյուռք մշակութային կապերի ամրապնդման գործում Սարգիս Կիրակոսյանի ունեցած ավանդի համար: «Իրոք, ողջունելի է, որ մեր պետությունը նկատել է սփյուռքահայ գրող, բանաստեղծ Սարգիս Կիրակոսյանի ներդրումը հայրենիքի և սփյուռքի մշակութային կապերի աշխուժացման, համագործակցության և նույնիսկ կառուցակարգման աշխատանքում»,- նշել է նա:

Դեսպան Քոչարյանի կողմից շքանշանի հանձնումից հետո իր սրտի խոսքն է փոխանցել Սարգիս Կիրակոսյանը:

«Ես մեկն եմ այն սերնդից, որի ներկայացուցիչներս տակավին 3-4 տարեկան, ՀՄԸՄ-ական, տակավին անգիտակից, Մայիսի 28-ի խորհրդով, եռագույնի շուքի տակ, մեծացանք եռագույնով, և եռագույնը մեծացավ մեր սրտերում: Եռագույնը, Մայիսի 28-ը, Հայաստանի Հանրապետության զինանշանը սրբազան մասունքի պես բարձր պահեցինք»,- նշել է նա՝ ավելացնելով, որ այս պահն իր համար, անկախ իր գրական բովանդակությունից, նաև ազգային ամբողջական բովանդակություն ունի, որովհետև Հայաստանի Հանրապետության վերանկախացմանն այո պատասխանած մեծ ժողովրդի վճռական որոշումից բացի այլ տարբերակ չկա: Կիրակոսյանը կարծում է, որ պետք չէ լինել արևմտահայ և արևելահայ, սփյուռքահայ և արցախահայ, այլ կա մեկ ժողովուրդ, հայ ժողովուրդ` իր ամբողջական մշակույթով, իր ամբողջական տեսլականով` ազատ, անկախ, ամբողջական Հայաստանի, ամբողջական հայությամբ կերտման տեսլականով:

Աղբյուրը՝ Orer.am