Դադարեցրե’ք դարձնել ժողովրդավարությունն ընտրովի. Կոստանյանն ընթերցեց «ՀայաՔվե»-ի նամակը Եվրահանձնաժողովի նախագահին

Կառավարության շենքի մոտ տեղի ունեցող ակցիայի ընթացքում «Հայաքվե» ազգային քաղաքացիական միավորման վարչության անդամ Աննա Կոստանայնն ընթերցեց Եվրահանձնաժողովի նախագահ Ուրսուլա ֆոն դեր Լեյենին ուղղված նամակը.

«Տիկի՛ն Ուրսուլա ֆոն դեր Լայեն,

Դուք Հայաստան եք ժամանել Բաքվից, որտեղ խոսել եք Հարավային Կովկասի վառ ապագայի մասին: Իսկ այսօր այստեղ եք` իբրև թե աջակցելու Հայաստանի ժողովրդավարական զարգացմանը, տնտեսական համագործակցությանը, ենթակառուցվածքների արդիականացմանը, էներգետիկ դիմակայունությանը, ինչպես նաև տարածաշրջանային խաղաղությանն ու կայունությանը:

Սակայն մենք` Հայաստանի քաղաքացիներս, Եվրոպայից սպասում ենք ոչ թե գեղեցիկ հայտարարություններ, այլ քաղաքական սկզբունքայնություն և հռչակված արժեքների պաշտպանություն, այլ ոչ երկակի չափանիշներ: Այսօր Հայաստանում կտրուկ արձանագրվում է ժողովրդավարական չափանիշների կտրուկ հետընթաց։ Ընդդիմադիր քաղաքացիական ակտիվիստները, քաղաքական և հանրային գործիչները հարյուրապատիկ ավելի հաճախ են ենթարկվում քաղաքական դրդապատճառներով պայմանավորված քրեական հետապնդումների։ Աննախադեպ քանակի քաղաքական բանտարկյալներ կան Հայաստանի բանտերում. ընդդիմադիր քաղաքական գործիչները, քաղաքացիական ակտիվիստները և իշխանության քննադատները ենթարկվում են քրեական հետապնդումների, տեղի է ունենում «ընտրովի արդարադատություն»։

Այս պահին «ՀայաՔվե» ազգային քաղաքացիական միավորման համակարգող Ավետիք Չալաբյանի կալանավորումը հերթական ապացույցն է, որ քաղաքական մրցակցությունը Հայաստանում գնալով դառնում է առավել վտանգավոր, որտեղ ճնշվում և լռեցվում է քաղաքական միտքը և սահմանափակվում քաղաքական պայքարի հավասար հնարավորությունները։ Ձեզ պետք է մտահոգի, որ Եվրոպայի գործընկեր ներկայացող իշխանության օրոք ընդդիմախոսներն ազատազրկվում են և հայտնվում բանտերում իրենց քաղաքական հայացքների կամ հանրային գործունեության համար:

Արդյոք եվրոպական որևէ պատվիրակություն վերջին տարիներին երբևէ այցելել է քաղաքական հարյուրավոր բանտարկյալներին: Եթե 2008 թվականին դա հնարավոր էր, ապա ինչո՞ւ է այսօր Եվրոպան լռում։ Ի՞նչ է փոխվել: Անընդունելի է նաև, որ Եվրոպական միությունը շարունակում է անվերապահ քաղաքական աջակցություն ցուցաբերել Հայաստանի գործող իշխանությանը՝ միաժամանակ անտեսելով մարդու իրավունքների խախտումների, քաղաքական հետապնդումների և խոսքի ազատության սահմանափակումների դեմ իրականացվող գործողությունների վերաբերյալ հանրային հնչող հազարավոր մտահոգությունները, տեղական և միջազգային իրավապաշտպան կազմակերպությունների և դիտորդական առաքելությունների զեկույցները:

Հենց այս պահին Հայաստանի Հանրապետության Սահմանադրական դատարանը դեռևս քննում է ընդդիմադիր քաղաքական ուժերի ներկայացրած հայտերի հիման վրա խորհրդարանական ընտրությունների արդյունքների վիճարկման գործը։ Չնայած դրան՝ Եվրոպական միության մի շարք անդամ պետություններ արդեն իսկ հասցրել են շնորհավորել Նիկոլ Փաշինյանին հաղթանակի կապակցությամբ։ Ի՞նչ է սա, եթե ոչ անարգանք Հայաստանի սահմանադրական ինստիտուտի և ՀՀ քաղաքացիների նկատմամբ. ստեղծվում է արտաքին քաղաքական լեգիտիմացման տպավորություն, մինչդեռ երկրի բարձրագույն դատարանը դեռևս իր վերջնական խոսքը չի ասել։

Դուք Բաքվից եք ժամանում, որտեղ հանդիպել եք ձեր մյուս գործընկերոջը` Իլհամ Ալիևին։ Միջազգային կազմակերպությունները տարիներ շարունակ բարձրաձայնում են քաղաքական բանտարկյալների և ընդդիմադիր քաղաքացիների նկատմամբ բռնաճնշումների մասին։ Վստահաբար տեղյակ եք նաև, որ արդեն շուրջ 1000 օրից ավելի է այնտեղ բանտված են Արցախի հայ ռազմաքաղաքական ղեկավարներն ու հասարակ հայեր, ովքեր զուրկ են իրենց պաշտպանության տարրական հնարավորություններից և արդար դատավարության իրավունքից: Դրան զուգահեռ Հայաստանում ևս իրականացվում է քաղաքական դրդապատճառներով պայմանավորված հետապնդումներ հայերի նկատմամաբ։

Ստացվում է, որ ձեր կողմից աջակցություն ստացող երկու քաղաքական գործընկերներն իրենց հակաժողովրդավարական քայլերով` գործում են ուղիղ ժողովրդավարության դեմ և կոտրում դրա մասին ձեր կողմից հռչակված արժեքները: Եվրոպական միությունը չպետք է երկակի չափանիշներ կիրառի տարբեր երկրների նկատմամբ։ Եթե մարդու իրավունքները Եվրոպայի համար արժեք են, ապա դրանք պետք է պաշտպանվեն բոլոր դեպքերում՝ անկախ քաղաքական ժամանակավոր շահերից կամ ձեզ համար նպաստավոր աշխարհաքաղաքական հաշվարկներից։ Եվրոպական միությունը մշտապես զգուշացնում է Հայաստանի քաղաքական գործընթացներում արտաքին ազդեցությունների վտանգների մասին։

 Սակայն ընտրություններից անմիջապես առաջ ԵՄ կողմից տրամադրված խոշոր ֆինանսական աջակցությունը և բարձր մակարդակի քաղաքական աջակցությունը Հայաստանի գործող իշխանությանն ուղիղ արտաքին միջամտությունը է որ կա, և հենց այդպես էլ ընկալվում է։ Եթե արտաքին ազդեցությունն անընդունելի է, ապա այդ սկզբունքը պետք է գործի բոլորի համար, այդ թվում նաև Եվրոպական միության` անկախ նրանից, թե այդ ազդեցությունը որտեղից է գալիս։ Հայաստանի քաղաքացիները Եվրոպայից չեն ակնկալում աջակցություն որևէ իշխանության։ Նրանք ակնկալում են աջակցություն Հայաստանի Հանրապետությանը, նրա ժողովրդավարությանը, անկախ դատական համակարգին, ազատ ընտրություններին և քաղաքական բազմակարծությանը։ Եթե Եվրոպական միությունը` հանձինս ձեզ, ցանկանում է մնալ արժեքների միություն, ապա այսօր պետք է համարձակություն ունենաք ձեր գործընկեր Նիկոլ Փաշինյանին բարձրացնելու այս հարցերը, որոնք մենք ուղղում ենք ձեզ` Հայաստանի քաղաքացիներն ու քաղաքական գործիչները։ Գիտակցեք, որ դուք աջակցում եք քաղաքական դիկտատորի, ով ճնշում է ազատ խոսքն ու քաղաքական հավասար մրցակցությունը: Դադարեցրե’ք դարձնել ժողովրդավարությունն ընտրովի, եվրոպական արժեքները չեն կարող պաշտպանվել միայն այնտեղ, որտեղ դա քաղաքականապես հարմար է ձեզ և ձեր տնտեսական շահերին»։