Հանրային վստահության նոր աշխարհագրությունը. ինչպե՞ս քաղաքական կեցվածքը դարձավ անարդարության դեմ պայքարի հիմնական գործիք. «Փաստ»

«Փաստ» օրաթերթը գրում է.

Հայաստանի հետընտրական իրականությունը թևակոխել է սկզբունքային մի փուլ, որտեղ հանրային քննարկումների առանցքը ոչ միայն իրավական վեճերն են, այլև քաղաքական դաշտում արժանապատվության ու կեցվածքի սահմանումը։ Այս համատեքստում «Բարգավաճ Հայաստան» կուսակցության շուրջ ձևավորվող լայն հանրային համախմբումը դառնում է ուշագրավ քաղաքական ֆենոմեն, որը լրջորեն փոխում է ուժերի դասավորությունը։

Եթե հետադարձ հայացք գցենք քարոզարշավի մեկնարկին, ապա ԲՀԿ-ի որդեգրած ռազմավարությունը շատերի համար հաճելի անակնկալ էր։ Այն ժամանակ, երբ իշխանական թևը փորձում էր ընտրապայքարը վերածել սպառնալիքների, անձնական վիրավորանքների և ջարդել-բռնելու հռետորաբանության, այս թիմը հանդես եկավ ընդգծված հանդարտությամբ, զսպվածությամբ ու հստակ ծրագրային դրույթներով։ Սա սովորական տակտիկա չէր, այլ գիտակցված քաղաքացիական դիրքորոշում, ինչը թույլ տվեց չտրվել բազմաթիվ սադրանքներին և դիմակայել թիմը քանդելու փորձերին։

Այս տոկունությունն ու որակը էլ ավելի ընդգծվեցին քվեարկությանը հաջորդած իրավական կամայականությունների փուլում։ Կենտրոնական ընտրական հանձնաժողովի պատմականորեն խայտառակ նիստի ժամանակ Իվետա Տոնոյանի անկեղծ, գրագետ և հիմնավորված խոսքը շրջադարձային եղավ հանրային ընկալման մեջ։ Հենց այդ ելույթի շնորհիվ հանրությունը տեսավ ու հասկացավ կատարվող ակնհայտ անարդարությունը, ինչն էլ ստեղծեց ԲՀԿ-ին հրապարակային աջակցություն հայտնելու աննախադեպ ալիք։

Այսօր արդեն, բացի իշխանական նեղ օղակից, հնարավոր չէ գտնել որևէ անկախ քաղաքական ուժ, իրավաբան, սահմանադրագետ կամ ակտիվ գործիչ, որը չդատապարտի տեղի ունեցողը։

Իսկ իրականությունն այն է, որ բոլորի աչքի առաջ օնլայն ռեժիմով իրականացվեց մի հրեշավոր գործընթաց, երբ ԿԸՀ-ն, ըստ էության, «գողացավ» Ազգային ժողով անցած մի ամբողջ խմբակցության մանդատները՝ անտեսելով մոտ վաթսուն հազար քաղաքացու վստահության քվեն։ Սրան հաջորդեց ևս մեկ անտրամաբանական քայլ. ընտրությունների հաջորդ իսկ օրվանից պատերազմ հայտարարվեց Գագիկ Ծառուկյանի տնտեսական ու բիզնես համակարգերի դեմ, ինչը քաղաքական վրեժխնդրության բացահայտ դրսևորում է։

Այս ամենի ֆոնին թիմի առանցքային դեմքերի՝ Իվետա Տոնոյանի, Արման Աբովյանի, Էլինար Վարդանյանի, Սուրեն Սուրենյանցի և մյուսների պարկեշտ, ազնիվ ու գրագետ պայքարը բոլորովին նոր բովանդակություն հաղորդեց ընթացող զարգացումներին։ Սահմանադրական դատարանում Էլինար Վարդանյանի հնչեցրած միտքը, թե սա ոչ թե լոկ կուսակցական հարց է, այլ ՀՀ քաղաքացու ընտրական իրավունքի պաշտպանություն, դարձավ այս պայքարի առանցքը։ Սեփական թիմի հանդեպ կիրառվող ահռելի ճնշումների պայմաններում էմոցիաները խեղդելն ու նման պետականամետ ձևակերպում տալը խոսում է բարձր քաղաքացիական գիտակցության մասին։

Այժմ բոլորը սպասում են Սահմանադրական դատարանի որոշմանը։ Թեև ներկայիս իրականության մեջ արդարադատության համակարգից դրական սպասելիքները մեծ չեն, սակայն մի բան արդեն իսկ փաստ է. այս ծանրագույն իրավիճակում Գագիկ Ծառուկյանն իրեն պահեց որպես արժանապատիվ լիդեր, ինչը միայն բարձրացրեց նրա անձնական հեղինակությունը, իսկ թիմի անդամները հանրության աչքերում վերածվեցին անարդարության դեմ մարտնչող և սիրված գործիչների։ ԲՀԿ-ի համար սրանք թեև դժվարագույն, բայց կարևորագույն օրեր են, քանի որ ամուր թիմի, կենսունակ ծրագրի և հաստատակամ առաջնորդի առկայությունը հիմք է ստեղծում հետագա ճիշտ ու հաղթական աշխատանքի համար։

Մանրամասները՝ «Փաստ» օրաթերթի այսօրվա համարում