ԱՄՆ Սենատն ընդունել է Թրամփի ռազմական լիազորությունները սահմանափակող բանաձև

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

ԱՄՆ Սենատը հավանություն է տվել Ներկայացուցիչների պալատի կողմից ավելի վաղ ընդունված բանաձևին, որը երկրի նախագահ Դոնալդ Թրամփին կոչ է անում դադարեցնել ամերիկյան զինված ուժերի օգտագործումը Իրանի դեմ ռազմական գործողություններ վարելու համար, գրում է The Hill-ը։

Այս բանաձևը համատեղ է, այսինքն՝ ընդունվում է ԱՄՆ Կոնգրեսի երկու պալատների կողմից, սակայն օրենքի կարգավիճակ չունի և նախագահի ստորագրությունը չի պահանջում։

Սենատը քվեարկել է 50 «կողմ» և 48 «դեմ» ձայներով։ Նախաձեռնությանը աջակցածների թվում են եղել չորս հանրապետական սենատորներ՝ Ռենդ Փոլը, Սյուզան Քոլինզը, Լիզա Մուրկովսկին և Բիլ Քեսիդին։ Դեմոկրատների կողմից դեմ է քվեարկել միայն Ջոն Ֆեթերմանը։

Ավելի վաղ այս ամսին Ներկայացուցիչների պալատը ընդունել էր բանաձևը 215 ձայնով, դեմ էին հանդես եկել 208 կոնգրեսականներ։

Թերթը ուշադրություն է հրավիրում այն հանգամանքի վրա, որ բանաձևին աջակցած հանրապետականները նախորդ շաբաթ արդեն քվեարկել էին նմանատիպ մեկ այլ նախաձեռնության օգտին՝ Սենատի արտաքին հարաբերությունների հանձնաժողովից։ Այն չի հավաքել բավարար թվով ձայներ, նշում է պարբերականը։

Վերջին ամիսներին ԱՄՆ-ում ակտիվորեն քննարկվում է այն հարցը, թե արդյոք երկրի նախագահն իրավունք ունի առանց Կոնգրեսի հավանության երկար ժամանակ ռազմական գործողություններ վարել մեկ այլ պետության դեմ։ Թրամփի վարչակազմում ելնում են այն դիրքորոշումից, որ այս դեպքում սահմանափակումներ չկան։ Միևնույն ժամանակ շատ կոնգրեսականներ կարծում են, որ նման դեպքերում «կանաչ լույս» է պահանջվում ոչ միայն գործադիր, այլև օրենսդիր իշխանության կողմից։

1973 թվականի ռազմական լիազորությունների մասին օրենքի համաձայն՝ նախագահը պետք է դադարեցնի ռազմական գործողությունը 60 օր անց, եթե Կոնգրեսը չքվեարկի պատերազմ հայտարարելու օգտին կամ չընդունի ուժի կիրառումը թույլատրող օրենք։

Օրենքը թույլ է տալիս այդ ժամկետը մեկ անգամ երկարաձգել 30 օրով, սակայն միայն այն դեպքում, եթե նախագահը գրավոր հաստատի Կոնգրեսին, որ ամերիկյան զորքերի անվտանգ դուրսբերումն ապահովելու համար անհրաժեշտ է լրացուցիչ ժամանակ։ ԱՄՆ Կոնգրեսը մինչ այժմ չի հավանություն տվել Իրանի դեմ ռազմական ուժի կիրառմանը, իսկ Սպիտակ տունը հրապարակայնորեն չի հասկացնել տվել, որ նախատեսում է ստանալ նման թույլտվություն։

Ի պատասխան այս բանաձևի Դոնալդ Թրամփը հայտարարել է, որ իր ռազմական լիազորությունները սահմանափակելու վերաբերյալ բանաձևի ընդունումը ժամանակավրեպ և անիմաստ էր, իսկ դրան աջակցած սենատորները այդպիսով օգնություն են ցուցաբերել Վաշինգտոնի հակառակորդներին։

«Այս սենատորները միայն բարդացրել են իմ աշխատանքը, բայց ես կհաղթահարեմ, այսպես թե այնպես, որովհետև ես միշտ հաղթահարում եմ»,- չորեքշաբթի Truth Social սոցիալական ցանցում գրել է Թրամփը։

Ամերիկացի առաջնորդն ընդգծել է, որ Թեհրանն այժմ պատրաստ է Վաշինգտոնին տալ «գործնականում ամեն ինչ՝ տասնամյակների ընթացքում առաջին անգամ հարգանք ցուցաբերելով Միացյալ Նահանգների և նրա նախագահի նկատմամբ»։

Հետևեք մեզ՝ այստեղ