Իրանը Իսրայելի տարածքի ուղղությամբ արձակել է 11 բալիuտիկ hրթիռ. ԱՄՆ-ում Իսրայելի դեսպան

Իրանի զինված ուժերը անցած գիշեր Իսրայելի տարածքի ուղղությամբ արձակել են 11 բալիստիկ հրթիռ։ Այսպիսի տվյալներ է ներկայացրել ԱՄՆ-ում հրեական պետության դեսպան Յեհիել Լեյտերը, հաղորդում է ՏԱՍՍ-ը:

«Այսօր Իրանը Իսրայելի տարածքի ուղղությամբ արձակել է 11 բալիստիկ հրթիռ։ Աշխարհում ոչ մի ինքնահարգանք ունեցող երկիր չի հանդուրժի նման հարձակումը, Իսրայելը նույնպես դա չի անի»,- նշել է Լեյտերը։

Ավելի վաղ՝ առավոտյան, իսրայելական զինվորականները արձանագրել էին Իրանի կողմից հրթիռների նոր ալիք։ Դրանից առաջ՝ գիշերը, Իսրայելի ռազմաօդային ուժերը հարվածներ էին հասցրել Իրանին։ Բանակի մամուլի ծառայությունը հայտարարել էր, որ դրանց թիրախը եղել են Իրանի արևմուտքում և կենտրոնում գտնվող ռազմական օբյեկտները։

Հունիսի 7-ի երեկոյան Իրանը հրթիռակոծել էր հրեական պետության հյուսիսային շրջանները։ Իսրայելական բանակը հայտարարել էր, որ բոլոր հրթիռները որսացվել են։ Դա տեղի էր ունեցել այն բանից հետո, երբ ավելի վաղ՝ կիրակի օրը, Իսրայելը հարված էր հասցրել Բեյրութի արվարձանում գտնվող «Հեզբոլլահի» օբյեկտին: Իսրայելական կողմի վարկածով՝ այդ հարձակումը պատասխան էր «Հեզբոլլահի» կողմից հրեական պետության հյուսիսային շրջանների հրթիռակոծություններին։ Իրանի իշխանությունները մինչ այդ զգուշացրել էին, որ պատասխան կտան Իսրայելին՝ լիբանանյան մայրաքաղաքին հարվածներ հասցնելու դեպքում։