Սերբիայի խորհրդարանական ընտրություններում հաղթանակ է տարել վարչապետ Վուչիչի կուսակցությունը

Սերբիայում ապրիլի 24-ին կայացած խորհրդարանական ընտրություններում մեծ առավելությամբ հաղթանակ է տարել «Ալեքսանդր Վուչիչ- Սերբիան հաղթում է» կոալիցիան, որը ձեւավորվել է կառավարող Սերբիայի առաջադիմական կուսակցության (ՍԱԿ) շուրջ, որը գլխավորում է վարչապետ Ալեքսանդր Վուչիչը: Այդ մասին, ինչպես տեղեկացնում է «Արմենպրես»-ը, վկայում են ընտրությունների նախնական արդյունքները, որոնք հայտարարվել են Հանրապետական ընտրական հանձնաժողովի (ՀԸՀ) կողմից: Ինչպես մամուլի ասուլիսում հայտնել է ՀԸՀ-ի նախագահ Դեյան Ջուրջեւիչը, Վուչիչի կոալիցիան ստանում է ձայների 49,30 տոկոսը:

Նրա խոսքով՝ 5-տոկոսանոց արգելքը հաղթահարում են եւս երեք կուսակցական ցուցակներ՝ Իվիցա Դաչիչի գլխավորած Սերբիայի սոցիալիստական կուսակցության շուրջ ձեւավորված կոալիցիան, որը հավաքել է ձայների 12,10 տոկոսը, Սերբիայի արմատական կուսակցությունը՝ Վոիսլավ Շեշելի գլխավորությամբ (7,94 տոկոս), «Հանուն արդար Սերբիայի- Դեմոկրատական կուսակցություն» ընդդիմադիր կոալիցիան (6,13 տոկոս):

Սերբիայի վարչապետ Ալեքսանդր Վուչիչն իր կոալիցիայի հաղթանակի մասին հայտարարել է Սերբիայի առաջադիմական կուսակցության նախընտրական շտաբում: Նա դա համարել է «պատմական հաջողություն» եւ Սերբիայի քաղաքացիների կողմից ընտրված քաղաքականության հաստատումը:

«Ես հպարտ եմ եւ հուզված ընտրությունների արդյունքներից»,- ասել է Վուչիչը: Նրա խոսքով՝ քվեարկության արդյունքները ցույց են տալիս «վճռական աջակցությունը ժողովրդավարությանը, բարենորոգումներին, միջազգային ջանքերին եւ եվրոպական ինտեգրացմանը»:

Վուչիչը նախընտրական արշավի ընթացքում քանիցս հայտարարել է, որ իր կուսակցության ռազմավարական նպատակը ԵՄ-ին Սերբիայի անդամակցումն է՝ պահպանելով Ռուսաստանի հետ լավ հարաբերությունները, ինչպես նաեւ երկիր ներդրումների ներգրավումը, հաղորդել է ՏԱՍՍ-ը:

Լուսանկարը` EPA