Այսօր հայկական բանակը պատրաստ է իրականացնել իր առջև դրված խնդիրները. Սեյրան Օհանյան

«Մենք վերահսկում ենք իրադրությունը, ձեռք է բերված ժամանակավոր հրադադար, որը որ պետք է մեզ հետ տանի 1994 թվականի մայիսի 12-ին ստորագրված եռակողմ հրադադարին»,- այս մասին այսօր Ծիծեռնակաբերդի հուշահամալիրում լրագրողների հետ զրույցում ասաց ՀՀ պաշտպանության նախարար Սեյրան Օհանյանը՝ պատասխանելով հարցին, թե լայնամասշտաբ գործողությունների վերսկսման վտանգ կա՞:

«Մենք ամեն ինչ պետք է անենք, որպեսզի այդ հրադադարը պաշտպանվի, քանի որ հրադադարի պաշտպանումը, վստահության մթնոլորտի ստեղծումը, միջազգային հետաքննության մեխանիզմների ձևավորումն է, որ հիմք կհանդիսանա հետագայում բանակցային գործընթացում առաջընթաց ունենալ: Թե ինչ նպատակներ ունեն այսօր, իհարկե, մենք այդ ուղղությամբ աշխատում ենք: Հայկական բանակը, Լեռնային Ղարաբաղի Հանրապետության Պաշտպանության բանակը պատրաստ են ամեն ինչ անել, հետ մղել ցանկացած ոտնձգություն և ապահովվել Արցախի անվտանգությունը»,- ասաց նախարարը:

Սեյրան Օհանյանը նշեց նաև, որ այսօր հայկական բանակը պատրաստ է իր առաջ դրված խնդիրներն իրականացնելու: Ըստ նրա՝ այն բարեփոխումները, որոնք իրականացվել են վերջին տարիների ընթացքում, և ԶՈւ-ի զարգացման պլանը, որը ձևավորվել է միջգերատեսչական հանձնաժողովի կողմից երկու տարվա աշխատանքի արդյունքում, համապատասխանում է պատերազմի այսօրվա բնույթին:

«Պարզապես, փոքր-ինչ առաջնահերթություններ կարող է լինել, որոնց վրա այսօր շեշտը դնում ենք: Այսօր ոչ միայն ես, այլև բոլորն են ասում, որ երբևէ թույլ չեն տա, որ լինի ճնշում Արցախի ժողովրդի վրա և ևս մեկ անգամ կրկնվի այն, ինչ եղել է 101 տարի առաջ: Այսօր ուզում եմ մենք գլուխ խոնարհենք ոչ միայն 1,5 մլն զոհերի, այլ Հայրենական պատերազմի, Արցախյան ազատամարտի, հետպատերազմյան տարիների, ինչպես նաև 2014-2015 թվականների լարվածության ընթացքում մեր տղաների, այս չորսօրյա պատերազմին մեր հերոսների հիշատակի առջև, որոնք մեր ազգին հպարտություն են բերում»,- նշեց Սեյրան Օհանյանը: