Օլիմպիական ջահը վառվել է Հունաստանում

 Օգոստոսին մեկնարկելիք 31-րդ ամառային Օլիմպիական խաղերի ջահը վառելու պաշտոնական արարողությունը 105 օր առաջ գլխավոր իրադարձությունից` Օլիմպիական խաղերի պաշտոնական մեկնարկից, կայացել է հունական Օլիմպիա ավանում` Հերայի նշանավոր տաճարում:

 «Արմենպրես»-ը հայտնում է, որ կրակը վառելու ավանդույթը պահպանվել է իր բոլոր տարրերի ճշգրիտ պահպանմամբ:

Ավանդույթի համաձայն` կրակը վառել են տաճարի քրմուհիները, որոնց դերում հատուկ ընտրված են եղել դերասանուհիներ: Գլխավոր քրմուհու դերն այս տարի նույնպես կերտել է հույն դերասանուհի Կատարինե Լեհուն:

Ըստ ավանդույթի՝ հին հունական Օլիմպիական խաղերից առաջ գլխավոր քրմուհին ինքնատիպ ու գեղեցիկ արարողակարգով խնդրում է աստվածներին մարդկանց ուղարկել օլիմպիական կրակը:  Օլիմպիական խաղերի կրակը վառվում է հատուկ հայելիների միջոցով:

Ռիոյում կայանալիք Օլիմպիական խաղերի կրակի առաջին ջահակիրը մարմնամարզիկ Էլեֆտերիոս Պետրունիասն է եղել: Նրան հաջորդել է բրազիլացի վոլեյբոլիստ, Օլիմպիական խաղերի կրկնակի չեմպիոն Ջիովանի Գավիոն:

Համաձայն կարգի` Օլիմպիական խաղերի կրակը Հունաստանում կմնա մոտ մեկ շաբաթ և ապրիլի 27-ին օդանավով կհասնի Բրազիլիայի մայրաքաղաք՝ երկրի նախագահի նստավայր, որտեղից էլ արդեն մայիսի 3-ից կսկսվի կրակի ջահային փոխանցումավազքը: Նախատեսված է, որ Օլիմպիական խաղերի կրակը փոխանցումավազքի 95 օրերի ընթացքում կանցնի 329 քաղաքով, 10000 մղոն օդով և 20000 կմ ցամաքով: Փոխանցումավազքին մասնակցելու են ավելի քան 12000 մարդ:

Ամառային Օլիմպիական խաղերի բացման պաշտոնական արարողությունը կայանալու է օգոստոսի 5-ին: Օլիմպիական 17 օրերի` օգոստոսի 5-21-ը, ընթացքում աշխարհի 206 երկներից ավելի քան 10500 մարզիկներ մրցելու են 306 մեդալների հավաքածուների համար:

2016 թ. Օլիմպիական խաղերը կանցկացվեն Ռիո դե Ժանեյրոյի 4 հիմնական շրջաններում` Կոպակաբանայում, Մարականայում, Դեոդորոյում և Բարայում գտնվող 33 մարզական ժամանակակից կառույցներում: