Երկարատև լռությունից հետո Ադրբեջանը խոստովանել է իր ևս մեկ գնդապետի կորուստը

Ապրիլի սկզբին Լեռնային Ղարաբաղի Հանրապետության դեմ սանձազերծած ռազմական ագրեսիայի հետեւանքով հարյուրավոր զինծառայողների ոչնչացման փաստը մինչ այժմ հասարակությունից թաքցնող Ադրբեջանը երկարատեւ լռությունից հետո խոստովանել է իր եւս մեկ գնդապետի կորուստը:

Ինչպես հաղորդում է «Արմենպրես»-ը' վկայակոչելով ադրբեջանական ԶԼՄ-ները, Ադրբեջանի պաշտպանության նախարարության մամուլի ծառայությունը խոստովանել է զինված ուժերի գնդապետ-լեյտենանտ Սյանան Թահիր օղլու Ախունդովի մահվան մասին' նշելով, որ նա, իբր, մահացել է «անվտանգության միջոցառումների խախտման արդյունքում»:

Ուշագրավ է այն փաստը, որ Ադրբեջանի ՊՆ-ն իր գնդապետի կորուստը խոստովանել է այդ մասին Facebook սոցիալական ցանցում երեք զինծառայողների սպանվելու եւ մեկի վիրավորվելու մասին օգտատեր Հաբիբ Մունթազիրի համառ գրառումներից հետո:

«Սոցցանցերի օգտատերերի նման վարմունքը հակառակորդին օգնում է տեղեկություններ ձեռք բերել Ադրբեջանի զինված ուժերի մասին եւ շատ բաներում պարզեցնում նրանց գործողությունները», -ասվում է Ադրբեջանի ՊՆ հայտարարության մեջ, որը Մունթազիրին մեղադրել է «պետական գաղտնիք» հրապարակելու մեջ:

Հաբիբ Մունթազիրն իր հերթին Meydan TV-ի հետ զրույցում ասել է, որ Ադրբեջանի ՊՆ-ը «շատ դանդաղ է աշխատում եւ գիտակցաբար ժողովրդից թաքցնում է զինծառայողների կորստի մասին տեղեկությունները»:

«Չնայած ապրիլի 1-5-ի իրադարձություններից երկու շաբաթ անցել է, ՊՆ-ն ոչ մի սպանված զինծառայողի անուն-ազգանուն չի հրապարակել, այդ մասին թվեր չի բացահայտել: Իսկ հակառակորդը մամուլում եւ սոցցանցերում հրապարակում է իր կորուստների մասին բոլոր տեղեկությունները: Ադրբեջանի ՊՆ-ը այդ մասին ստիպված հայտնում է սոցցանցերում տեղեկությունները տարածվելուց հետո' դրանով ցույց տալով իր անկարողությունը: Սակայն, փոխանակ հասարակությունից թաքցնի տեղեկությունները, ժողովրդին թողնի հակառակորդի մամուլի հույսին, լավ կլինի, որ ՊՆ-ն ժամանակ առ ժամանակ հայտարա րի իր կորուստները: Ադրբեջանական ժողովուրդն ավելի շատ վստահում է Հաբիբ Մունթազիրին, քան ՊՆ-ին, ինչը երեւում է այն բանից, որ իմ տեղեկությունն այս պահին կարդացել է 1110 օգտատեր, իսկ ՊՆ-ի տեղեկությունը' 149 օգտատեր», -ասել է Մունթազիրը:

Բացի այդ, Ադրբեջանի ՊՆ մամուլի ծառայությունը հատուկ նշել է, որ «զորքերի շփման գծում տեղի ունեցող վերջին իրադարձությունների ընթացքում զոհվածների, վիրավորների մասին տեղեկությունները, նրանց տվյալները եւ զինվորական մասնագիտությունները պետական գաղտնիք են կազմում, եւ տարբեր սոցցանցերի որոշ օգտատերեր նպատակամետ հավաքում եւ տարածում են տվյալ տեղեկությունը»:

Ադրբեջանական Meydan TV հեռուստաալիքը սոցցանցերում սեփական հետազոտությունների արդյունքներով ապրիլի 11-ին հայտնել էր ապրիլի 1-5-ին ռազմական գործողությունների արդյունքում ադրբեջանական կողմի հարյուրից ավելի սպանված եւ 500-ից ավելի վիրավոր զինծառայողներ լինելու մասին:

ԼՂՀ ՊԲ համաձայն' ապրիլի 1-5-ին ԼՂՀ դեմ ռազմական սադրանքին հայկական կողմի ջախջախիչ հակահարվածի արդյունքում Ադրբեջանը կորցրել է 2 ուղղաթիռ, 24 տանկ, 3 հետեւակի մարտական մեքենա, 1 ինժեներական տեխնիկա, 7 անօդաչու սարք, 1ՄՄ 21 ռեակտիվ հրետանու մարտական մեքենա: Մարտական գործողությունների ընթացքում ադրբեջանական զինուժը տվել է ավելի քան 500 կորուստ, մոտ 2000 վիրավոր: