Վոլեյբոլի հայ մարզիչները որակավորվել են

 Հայաստանի վոլեյբոլի ֆեդերացիայի նախաձեռնությամբ և մարզաձևի Միջազգային ֆեդերացիայի աջակցությամբ ապրիլի 13-17-ը Երևանում տեղի է ունեցել «Volleyball Your Way» մարզչական սեմինարը: «Արմենպրես»-ը, վկայակոչելով Հայաստանի վոլեյբոլի ֆեդերացիային, հայտնում է, որ սեմինարը վարելու համար Վոլեյբոլի միջազգային ֆեդերացիայից Երևան էր գործուղվել մարզ չական գործի գիտակ, չեխ մասնագետ Միլոսլավ Էջեմը:

Սեմինարին մասնակցելու բացառիկ իրավունք էին ստացել Հայաստանից տարբեր մարզերից հայտ ներկայացրած 31 մարզիչներ, ովքեր զբաղվում են մարզչական գործունեությամբ կրթելով վոլեյբոլի մանկապատանեկան թիմերի: Մասնագետները հնգօրյա սեմինարի ժամանակ տեղեկացան վոլեյբոլի տեխնիկական պատրաստությանը, տակտիկական նոր համակարգերին:

Հնգօրյա դասընթացի վերջում էլ հանձնելով տեսական և գործնական քննություններ՝ մասնակիցներից 25-ին տրվեց Միջազգային ֆեդերացիայի առաջին կարգի որակավորման հավաստագրեր:

Սեմինարի շրջանակներում անցկացվել է նաև մանկապատանեկան փառատոն-առաջնություն, որին մասնակցել են 100-ից ավելի պատանի վոլեյբոլիստներ: Խորհրդանշական միջոցառմանը մասնակցել են Երևանի՝ Աջափնյակ, Արաբկիր, Ավան և Շենգավիթ համայքների և Գավառ քաղաքի տղաների և աղջիկների թիմերը: Մրցմանը հանդես են եկել 8-10 և 10-13 տարեկան տղաների և աղջիների թիմեր: Ընդհանուր անցկացվել է 32 հանդիպում:

8-10 տարեկանների մրցապայքարում առաջին տեղ գրավել է «Ավան-1»-ը, երկրորդ տեղը՝ «Ավան-2», երրորդ տեղում է եղել «Շենգավիթ» թիմը: 10-13 տարեկանների պայքարում 1-ին տեղը գրավել է «Արաբկիր» թիմը,իսկ երկրորդ տեղում է եղել «Ավան-1»-ը: Երրորդ տեղն է զբաղեցրել «Աջափնյակ» թիմը: Մրցանակային տեղեր գրաված թիմերը պարգևատրվել են դիպլոմներով, խորհրդանշական գավաթով, իսկ մասնակից թիմերին մարզաձևի Հայաստանի ֆեդերացիան նվիրել է գնդակներ: