Փոքրիկ Տիգրանի մաhից 1 տարի է անցել. ի՞նչ է պարզվել մինչ օրս

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին                     

Փոքրիկ Տիգրանի դժբախտ պատմությունը ցնցել էր ամբողջ Հայաստանը։ Մայիսի 9-ին փոքրիկ Տիգրանի ծննդյան օրն է․ նա կդառնար 3 տարեկան։

MediaHub-ը հիշեցնում է՝ նախորդ տարվա մայիսի 4-ին Հրազդան խոշորացված համայնքի Մարմարիկ գյուղում 2 տարեկան երեխայի էին որոնում։

Փոքրիկ Տիգրանը բակում խաղալիս է եղել։ Ծնողները մտածել են, թե երեխան տանն է՝ քրոջ հետ, սակայն որոշ ժամանակ անց պարզվել է, որ նա անհետացել է։ Որոնողական աշխատանքների ընթացքում շրջանառվում էին տարբեր վարկածներ։ Շաբաթներ տևած որոնումներից հետո՝ մայիսի 24-ին, ժամը 10։40-ի սահմաններում, ՆԳՆ փրկարար ծառայության աշխատակիցները Մարմարիկ գետում՝ Հրազդան ՋԷԿ-ի մոտակա կամրջի հատվածում, հայտնաբերել էին մայիսի 4-ից որոնվող երեխայի դին։ Քննչական կոմիտեից հայտնել էին, որ Մարմարիկում հայտնաբերված 2-ամյա Տիգրանի մարմնի արտաքին զննությամբ վնասվածքներ և բռնության հետքեր չեն հայտնաբերվել։ Նշանակվել էր դիակի դատաբժշկական փորձաքննություն։

MediaHub-ի տեղեկություններով՝ երեխայի մահը վրա էր հասել ջրահեղձման հետևանքով։

Քննչական կոմիտեից հաստատել էին MediaHub-ի տեղեկությունը՝ նշելով․ «Համաձայն փորձաքննության եզրակացության՝ երեխան մահացել է մեխանիկական շնչահեղձությունից՝ շնչուղիների ջրով փակվելու, այսինքն՝ ջրահեղձման հետևանքով»։ Նշենք, որ ամիսներ առաջ մահացել էր նաև Տիգրանի հայրը՝ Նորայր Պետրոսյանը։

Մեկ տարի անց ի՞նչ է կատարվում Մարմարիկում․ արդյո՞ք այն հատվածը, որտեղից ընկել էր Տիգրանը, փակվել է, և վտանգավո՞ր չէ արդյոք մյուս երեխաների համար։ MediaHub-ը զրուցել է Մարմարիկի վարչական ղեկավար Արթուր Քարամյանի հետ։ Նա նշել է, որ չգիտի՝ երեխան որտեղից է ընկել, և հավելել, որ հնարավոր չէ ամբողջությամբ փակել գետի տարածքը։ «Այդ հատվածից Տիգրանն էր ընկել, գետի բոլոր հատվածները հո չե՞նք փակելու»,- ասել է նա։

MediaHub-ի հարցին՝ արդյոք այն հատվածը, որտեղից ընկել էր Տիգրանը, փակվել է, վարչական ղեկավարը պատասխանել է․ «Ճիշտն ասած, ես չգիտեմ՝ Տիգրանը որտեղից էր ընկել, երեխային գետից են գտել»։

Փոքրիկ Տիգրանի ընտանիքը շարունակում է ապրել Մարմարիկում։ Ինչպես MediaHub-ին հայտնել է վարչական ղեկավարը, ընտանիքը շարունակում է ապրել այնպես, ինչպես մինչ այդ։

Մարիաննա Արամյան

Հետևեք մեզ՝ այստեղ