Հենց տնից դուրս եկա, սնարյադն ընկավ մեր տան վրա. թալիշցի կինը վերհիշում է ապրիլի 2-ի մղձավանջը

News.am-ը գրում է .

Թալիշցի Էլմիրա Սահակյանը ապրիլի 2-ին ադրբեջանական արկակոծումից հրաշքով է փրկվել. տնից դուրս գալուց րոպեներ հետո արկը պայթել է հենց նրա տան մեջ:

«3 անց կես էր, մենք հանգիստ քնած էինք, պատահական ղռռոց եկավ, իմացանք, թե մեր տունը փլվեց: Փոքր տղաս նորածին երեխա ունի, երկու երեխան գրկել ա, գոմն ա վազել: Տղայիս ասում եմ՝ արի գնանք տուն, ծածկոց բերենք: Կրակոցների տակ մտանք տուն, մի հատ գռռոց եկավ, իմացանք, թե տունը վառվեց, տղաս ասեց՝ վայ, մամա, երեխեքս: Տղաս հետո երեխեքին վերցնում, իջացնում ա գյուղի ներքեւը, ես էլ դողդողալով իջնում եմ տուն, որ երեխեքին տակաշոր վերցնեմ, հենց տնից դուրս եկա, սնարյադն ընկավ մեր տան վրա»,- NEWS.am-ին պատմեց տիկին Էլմիրան:

Սահակյանները այդ օրը հասել են անվտանգ վայր, այնտեղից էլ՝ Ստեփանակերտ: Տեղի ունեցածը ընտանիքի մայրը մղձավանջի պես է հիշում, երբեք մտքով չի անցել, որ ստիպված է լինելու թողնել իր 21 տարվա տունը:

«Չէինք ուզում դուրս գալ, չէինք հավատում, որ գյուղը կարող ենք թողնել ու դուրս գալ: Մենք երկու կռիվ ենք տեսել, չենք ուզել փախչենք, բայց գնացել ենք: Մենք չենք պատկերացրել, որ երկրորդ անգամ կարող ա նման բան տեսնենք, որ կարող ա պատահի՝ իմ տունը ավերակ դառնա: Արդեն սովորել էինք ավտոմատի կրակոցին, ասում էինք՝ դրսից հաչում են: Դրանից հետո բեսպիլոտնիկին էլ սովորեցինք, բայց էդ աստիճանի՞,  չեմ պատկերացրել, որ կարող ա՝ տենց լինի»,- նշեց նա:

Սահակյանների տան վրա 7 արկ է ընկել: Ընտանիքի 4 թոռները հարսների հետ Ստեփանակերտ են տեղափոխվել, ընտանիքի երեք տղամարդիկ առաջնագծում են:

Ընտանիքի անդամները տիկին Էլմիրային չեն կարողանում համոզել, որ ժամանակավորապես Ստեփանակերտ տեղափոխվի:

«Ես գնացել եմ Թալիշի ճանապարհին տուն կա, էնտեղ եմ մնում: Ես հիմա պիտի իմ տղաների մոտ լինեմ: Ես երկրորդ պատերազմն եմ տեսել, դրա համար իմ սիրտը ուրիշ ձեւ ա լցված»: