Դպրոցականները խոստանում են առաջիկայում ստեղծել բանակի համար օգտակար ռոբոտից մինչև մարդանման ռոբոտ

 «Ական փնտրող ռոբոտներ» մրցույթի թիմերն առաջիկայում նախատեսում են պատրաստել բանակի համար օգտակար ռոբոտից մինչև մարդանման ռոբոտ: Ապրիլի 16-ին կայացավ մրցույթի եզրափակիչ փուլի ժամանակ լրագրողների հետ զրույցում հայտնեցին մի քանի թիմերի ներկայացուցիչները:

Վեդի քաղաքի ավագ դպրոցի թիմի անդամ Ալեքսան Ալեքսանյանի խոսքով, երբ իրենց ռոբոտը երկաթ է գտնում, սարքի վրայի լույսն անջատվում է, միաժամանակ ազդանշան է գալիս համակարգչին, ու իրենք այդպիսով հասկանում են, որ ռոբոտը կատարել է առաջադրանքը: «Այն կառավարվում է ինտերնետով, սարքերը շատ լավը չեն, նախատեսված են մրցույթի համար ու մինչև 5 սանտիմետր խորությամբ գտնվող երկաթի կտորն են գտնում»,-«Արմենպրես»-ի փոխանցմամբ՝ ասաց նա:

Ալեքսանը տեղեկացրեց, որ ական փնտրող ռոբոտ պատրաստելու առաջին փորձն էր, բայց մինչ այդ իրենք ստեղծել են երկու այլ ռոբոտներ, որոնցից մեկը Դիջիթեք ցուցահանդեսի բացումն է  կատարել` ժապավենը կտրելով: «Երկրորդն էլ բանակին օգնական ռոբոտն է, որը պետք է օգներ զինվորներին` հասցնելով առաջին բուժօգնություն: Ուներ երկու դարակ, որոնք բացվում էին ու նկարում հակառակորդի դիրքերը, մյուսն էլ պետք է ռումբ նետեր հակառակորդի սահմանների վրա: Իսկ եթե հայտնաբերվում էր ռոբոտը, իր վրա պետք է լիներ ինքնաոչնչացման համակարգ, որի արդյունքում թշնամուն կտար մեծ մարդկային ու տեխնիական կորուստներ: Ապագայում կպատրաստենք բանակին օգտակար ռոբոտ, պարզապես մեզ դրա համար անհրաժեշտ են հատուկ սարքեր»,-նշեց աշակերտը: 

Սիսական թիմը ներկայացնող Արմեն Ենոքյանն էլ անկեղծացավ` նշելով. «Ճիշտն ասած՝ մեր ընկերներն էին դիմել մասնակցության համար, մենք չգիտեինք, բայց քանի որ իրենք այստեղ չեն, մենք պետք է ներկայացնենք: Մրցույթի մասին իմացել ենք 3-4 օր առաջ և ձեռքի տակ եղած միջոցներով փորձել ենք պատրաստել ռոբոտը: Երկու սալիկ ենք համադրել. հեռաչափերով և ականը գտնելու սենսորով է ռոբոտը որոշում` որտեղ է ականը: Ֆիզիկապես նշում է այդ տարածքը, պարկ ենք սարքել, որի բերանը բացվում է, այդ տեղում ավազ է լցվում ու նորից փակվում է և անցնում մյուս ականների որոնմանը»: Նրա խոսքով՝ մինչև 8 սմ խորությամբ պահված ականները ռոբոտը հայտնաբերում է: 

«Դիջիթալ Քլաուդ» թիմը ներկայացնող Գյումրու Պոլիտեխնիկական համալսարանին կից ավագ դպրոցի խմբակավար Դավիթ Նիկողոսյանն էլտեղեկացրեց, որ իրենց ռոբոտի ստեղծման մեջ կիրառել են հայկական արտադրության «ՍեՌոբ» ապարատային հարթակն ու Ռոբոտիքսի կոնյուկցիայի մասերը: Այս ռոբոտը ական գտնելու դեպքում նշյալ վայրերում տեղադրում է օղակներ, որոնք լցված են խողովակի մեջ: «Հետո ռոբոտը հետ է գնում, որ չբարձրանա ականի վրա ու չպայթի: Հետ է գնում, շրջվում աջ կամ ձախ ու մյուս ուղղությամբ է շարժվում»,-ասաց Դավիթ Նիկողոսյանը: Նրա խոսքով` իրեն ց ռոբոտը կարող է հայտնաբերել 6-7 սմ խորության վրա գտնվող ականներ:

Թիմը նախկինում էլ մասնակցել է ԱրմՌոբոտիքսի տարբեր մրցույթների: «Վերջինը, որ մասնակցել ենք, եղել է իրեր տարբերակող մրցույթը, առաջին տեղ ենք գրավել. Մեր ռոբոտը բոլոր իրերն ու տարաները կարողացել է ամբողջովին տեղադրել իրենց տեղերում: Մասնակցել ենք նաև սև գծին հետևող ռոբոտի մրցույթին, որի ժամանակ էլ գրավել ենք երկրորդ տեղը: Առաջիկայում ուզում ենք մարդանման ռոբոտ պատրաստել Դիջիթեքի համար: Ուզում ենք քայլող ռոբոտ լինի, քանի որ մինչ այժմ եղել է անիվների վրա»,-նշեց խմբակավարը: 

Թալինի ավագ դպրոցի ռոբոտաշինության խմբակի ProRobot թիմի անդամ Վիգեն Խաչատրյանն էլ նշեց, որ իրենց ռոբոտը հայկական «ՍեՌոբ»-ի և «Լեգո»-ի համադրություն է: «Ռոբոտն աշխատում է երկաթ զգացող սենսորով, երբ զգում է ական, նշում է տեղը և մեկ դետալ նետում: 2-3 սմ խորության վրա գտնվող ականը հայտմաբերում է վայրկյանների արագությամբ»,-ասաց Վիգեն Խաչատրյանը` հավելելով, որ ռոբոտը պատրաստելու համար ծախսել են 10-15 օր: «Մենք չենք փորձել ռոբոտի տեսքը նայել ինչ-որ տեղից, մեր կարողություններով ենք պատրաստել: Մենք մասնակցել ենք գծին հետևող ռոբոտների մրցույթին, մրցանակային տեղ չենք զբաղեցրել, բայց լավ ցուցանիշ ենք գրանցել: Մենք կփորձենք մասնակցել շատ այլ մրցույթների ևս»,-հավալեց Վիգենը: 

«Ական փնտրող ռոբոտներ» մրցույթի առաջին մրցանակակիրն է Երևանից մի խումբ ուսանողների «Ականավոր» թիմի ռոբոտը, մրցանակը 600 հազար դրամ է:Երկրորդը Գյումրու «Ընտանիք կենտրոնի» Անդրոիդ թիմն է, արժանացել է 400 հազար դրամական պարգևի, երրորդ տեղն է զբաղեցրել Գյումրու պոլիտեխնիկական ավագ դպրոցի «ԴիÕ �իթալ Քլաուդ» թիմը` 260 հազար դրամ մրցանակով: Խրախուսական պարգևի` 100 հազար դրամի է արժանացել Վանաձորից «Ականազերծող» թիմը: