Հովհաննես Գաբուզյանը հաղթեց Համաշխարհային ուսանողական խաղերում

Արաբական Միացյալ Էմիրությունների Աբու Դաբի քաղաքում ընթացող Համաշխարհային ուսանողական 14-րդ խաղերում հայ շախմատիստների, այդ թվում՝ տղաների պայքարում մրցաշարում հաղթող ճանաչված 20-ամյա Հովհաննես Գաբուզյանի բավականին հաջող ելույթների շնորհիվ Հայաստանի հավաքականը զբաղեցրել է 2-րդ տեղը: «Արմենպրես»-ը հայտնում է, որ Համաշխարհային ուսանողական խաղերին Հայաստանը ներկայացնում էին 4 երիտասարդ շախմատիստներ, ովքեր ներկայում սովորում են Ֆիզիկական կուլտուրայի հայկական պետական ինստիտուտում:

Տղաների մրցապայքարում Հայաստանը ներկայացուցիչներն էին գրոսմայստերներ՝ 22-ամյա Սամվել Տեր-Սահակյանը և 20-ամյա Հովհաննես Գաբուզյանը, ինչպես նաև միջազգային վարպետ 21-ամյա Տիգրան Ս. Պետրոսյանը: Աղջիկների մրցաշարում հանդես էր գալիս Հայաստանի 2016 թ. շախմատի չեմպիոնուհի, միջազգային վարպետ 21-ամյա Մարիա Գևորգյանը:

Տղաների պայքարում փայլուն հանդես եկավ Հովհաննես Գաբուզյանը, ով 9 հնարավորից վաստակեց 8 միավոր և դարձավ Համաշխարհային ուսանողական 14-րդ խաղերի չեմպիոն: Սամվել Տեր-Սահակյանը զբաղեցրեց 4-րդ, իսկ Տիգրան Ս. Պետրոսյանը՝ 7-րդ հորիզոնականը:

Աղջիկների պայքարում առաջին 5 պարտիաներից հետո հիանալի արդյունք ունեցող Մարիա Գևորգյանը մրցաշարի վերջնամասում զիջեց դիրքերը, ինչի արդյունքում վերջնարդյունքում գրավեց ընդամենը 10-րդ հորիզոնականը: Ամենայն հավանականությամբ, որոշիչ դեր խաղաց մարզուհու՝ առաջատար լինելու փորձի պակասը:

Թիմային հաշվարկում Հայաստանի շախմատի հավաքականը գրավեց երկրորդ հորիզոնականը՝ իրենց առաջ թողնելով միայն Ռուսաստանի՝ բավականին ուժեղ շախմատիստներիով համալրված շախմատի հավաքականին: