Ֆրանսիայում նախկին ռազմական զորավարժարանի տարածքում անցկացված անօրինական ռեյվից հետո 12 մարդ է հոսպիտալացվել

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին                     

Ֆրանսիայի Շեր դեպարտամենտում անօրինական ռեյվ-փարթիի ընթացքում տուժել են տասնյակ մասնակիցներ․ 12 մարդ հոսպիտալացվել է, այդ թվում՝ ծանր դեպքերով, որոնք, ենթադրաբար, կապված են թմրամիջոցների օգտագործման հետ, հայտնում է France Info-ն։

Միջադեպը տեղի է ունեցել կիրակի՝ մայիսի 3-ին, Բուրժ քաղաքի մոտակայքում։ Պրեֆեկտուրայի տվյալներով, նախկին ռազմական զորավարժարանի տարածքում, որը իշխանությունները վտանգավոր են համարում հնարավոր չպայթած զինամթերքի առկայության պատճառով, հավաքվել էր շուրջ 17 000 մարդ։

Ֆրանսիայի ներքին գործերի նախարար Լորան Նյունյեսի տեղեկություններով, ընդհանուր առմամբ գրանցվել է բժշկական օգնության 28 դիմում հարաբերական հրատապության վիճակում և 5-ը՝ ծանր, ծայրահեղ վիճակներում։

Հոսպիտալացումների հիմնական պատճառը, նախնական տվյալներով, միջոցառման ընթացքում թմրամիջոցների օգտագործումն է եղել։

Միջոցառումը չարտոնված «ֆրի-փարթի» էր, այսինքն՝ անօրինական երաժշտական ռեյվ։ Իշխանությունները հայտնել են, որ այն կազմակերպվել էր նախկին ռազմական օբյեկտի տարածքում, որը շարունակում է պոտենցիալ վտանգավոր մնալ պատերազմի ժամանակներից մնացած չպայթած արկերի պատճառով։

Դեպքի վայր ժամանած ներքին գործերի նախարար Լորան Նյունյեսը տեղի ունեցողը անվանել է «անօրինական երաժշտական միջոցառում» և հայտարարել, որ մասնակիցները գիտակցաբար են ընտրել այս հարթակը։ Նա նաև նշել է, որ ռեյվի ավարտից հետո տարածքը լքող բոլոր անձինք կտուգանվեն՝ ինչպես ռազմական օբյեկտ ապօրինի ներթափանցման, այնպես էլ արգելված զանգվածային միջոցառմանը մասնակցելու համար։

Իրավիճակը վերահսկելու համար մոբիլիզացվել է ավելի քան 600 ժանդարմ, իսկ ռեյվի անցկացման գոտու շուրջ տեղադրվել է 14 անցակետ։

Իշխանությունների լրացուցիչ մտահոգությունն առաջացրել է նաև չպայթած զինամթերքի հայտնաբերումը։ Շաբաթ օրը RD102 ճանապարհի մոտ հայտնաբերվել էր արկ, որից հետո սակրավորները այն տեղափոխել էին անվտանգ վայր։ Ավելի ուշ հայտնաբերվել էր ևս մեկ զինամթերք, դրա վնասազերծման աշխատանքները շարունակվում են։

Հետևեք մեզ՝ այստեղ