Հայրենիքին ծառայելը միայն երգ կամ ֆիլմի համար սցենար գրելով չէ. Քրիստ Մանարյանը սահմանին է

Լife.panorama.am-ը գրում է .

Երգահան, դրամատուրգ, սցենարիստ Քրիստ Մանարյանն այս օրերին Արցախում է՝ իր խոսքով ոչ թե արցախցիների կողքին լինելու, այլ զինվորների հետ միասին անհրաժեշտության դեպքում կռիվ տալու նպատակով:

Life.panorama.am-ի հետ զրույցում Քրիստ Մանարյանը պատմեց, որ դեռեւս ղարաբաղա-ադրբեջանական սահմանագծում տեղի չէին ունեցել վերջին իրադարձությունները, երբ ընկերներին իր պատրաստակամությունն էր հայտնել անհրաժեշտության դեպքում գնալ սահման եւ զինվորների հետ հավասար պահպանել հայրենակիցների անդորրը.

«Դեռ շատ վաղուց իմ լավ ընկերներ Սարգիս Միքայելյանին եւ Արեգ Նազարյանին ասել էի, որ Աստված մի արասցե, եթե հարկ եղավ, ես ուզում եմ համալրել իրենց շարքերն ու գնալ Արցախ ու այդպիսով օգտակար լինել հայրենիքիս: Այսինքն, իմ՝ այստեղ մեկնելու որոշումը վաղուց էր կայացված: Հայրենիքին ծառայելը միայն երգ գրելով կամ ֆիլմի համար սցենար գրելով չէ, եթե այսօր ես գիտեմ, որ կարող եմ անել ավելին, քան ուժերս ներում են, ուրեմն անկասկած պետք է անեմ: Իհարկե, պատերազմն ամեն մեկի խելքի բանը չէ, այստեղ բացի մեծ ցանկությունից եւ հայրենասիրությունից նաեւ ֆիզիկական տվյալներ են պետք, ինչով էլ մենք զբաղված ենք այս ընթացքում»,- նշեց դրամատուրգն ու ավելացրեց.

«Ես Արցախ եմ եկել հայրենիքիս ծառայելու «Անկախության բանակի» շարքերում, որը գտնվում է Աշոտ Աղաբաբյանի հրամանատարության ներքո, որն էլ մտնում է Արթուր Ալեքսանյանի հրամանատարությամբ գործող «Ամարաս» հատուկ գումարտակի մեջ: Մեր կոնկրետ տեղակայման վայրը, բնականաբար, ասել չեմ կարող, միայն կարող եմ նշել, որ մենք գտնվում ենք առաջին գծի երկրորդ շարքում, ինչը նշանակում է առաջին ռեզերվում եւ ցանկացած պահին կարող ենք կատարել ամեն կարգի մարտական առաջադրանք եւ հայտնվել հենց առաջին գծում: Հատուկ պետք է նշեմ, որ մեզ մոտ գործում է խիստ կարգ ու կանոն, պայմաններն էլ հրաշալի են, ողջ ժամանակ զբաղված ենք մեր մարտական պատրաստականությունը կատարելագործելով, քանի որ այստեղ մարդիկ կան, ովքեր անցել են առաջին պատերազմն ու նրանց ուժն ուղղակի անգնահատելի է: Մեզ համար շատ մեծ նշանակություն ունի այն, որ գտնվում ենք մեր երիտասարդ հերոսների կողքին, ովքեր օրեր առաջ իսկական հրաշք կատարեցին»:

Քրիստ Մանարյանն իր հիացմունքի խոսքը հայտնեց սահմանին կանգնած զինվորականներին ու նաեւ նրանց, ովքեր քառօրյա պատերազմում զոհվելով հերոսացան.

«Փառք ու պատիվ նրանց, ովքեր կյանքի գնով պահեցին մեր սահմանները ու  նաեւ փառք ու պատիվ նրանց, ովքեր այսօր պատրաստ են զենք վերցնել ձեռքներն ու հոգու կանչով պաշտպանել հայրենիքը»,- նկատեց Մանարյանն ու խոսեց պարտադիր ժամկետային զինծառայողներից.

«Ժամանակները փոխվել են եւ այն անդրադարձել է նաեւ պատերազմի վարման վրա: Գուցե մի փոքր անհեթեթ թվա, բայց ըստ իս անգամ համակարգչային խաղերը իրենց դրական ազդեցությունն են թողել մեր երիտասարդների վրա ճիշտ պատերազմելու համար, որովհետեւ ապշել կարելի է մեր զինվորների այդքան դիպուկ ու ճիշտ պատերազմելու ունակությունից: Ես այս հարցում ոչ բավարար գիտելիքներ ունեմ, բայց կարծում եմ շատ բան է փոխվել 90-ականների եւ մեր օրերի մարտավարության միջեւ, պատերազմի տրամաբանությունը ուրիշ է դարձել: Այսօր մեր երիտասարդներն ու մենք՝ավագներս, իրարից շատ բան ունենք սովորելու, այո, պետք է իրարից սովորենք ու  պատրաստ լինենք փոխհամագործակցության»,- զրույցն ավարտեց Քրիստ Մանարյանը:

Հեղինակ՝ Անուշիկ Մելքոնյան