Լիգա F. «Բարսելոնայի» կանանց թիմը 7-րդ անընդմեջ անգամ հռչակվեց Իսպանիայի չեմպիոն

Պերե Ռոմեուի գլխավորած թիմը նվաճել է Իսպանիայի կանանց առաջնության չեմպիոնի կոչումը՝ ակումբի պատմության մեջ 11-րդ անգամ դառնալով երկրի լավագույն թիմը։

Կատալոնական ակումբն անկասելի է ներքին առաջնությունում. այս 11 տիտղոսներից 7-ը «բլաուգրանան» նվաճել է վերջին յոթ մրցաշրջաններում։ Այս ցուցանիշով «Բարսելոնան» ամրապնդեց իր բացարձակ առաջատարի դիրքերը՝ էլ ավելի մեծացնելով անջրպետը մոտակա հետապնդողից՝ Բիլբաոյի «Ատլետիկից», որն իր ակտիվում ունի 5 տիտղոս։

Երկրորդ լավագույն արդյունքը Եվրոպայում

«Բարսելոնայի» կանանց թիմն այժմ գրանցել է անընդմեջ չեմպիոնությունների երկրորդ լավագույն շարքը Եվրոպայի թոփ-առաջնություններում՝ գերազանցելով Լոնդոնի «Չելսիի» ռեկորդը (6 անընդմեջ տիտղոս)։ Այս ցուցանիշով կատալոնացիներին գերազանցում է միայն ֆրանսիական «Լիոնը», որը 2006-ից 2020 թվականներին աներևակայելի արդյունք է գրանցել՝ 14 անգամ անընդմեջ հռչակվելով երկրի չեմպիոն։

100 գոլի սահմանագիծը՝ հաղթահարված

Կատալոնական ակումբի գերակայությունն արտացոլվում է ոչ միայն տիտղոսներով, այլև ռմբարկուական բացառիկ ցուցանիշներով։ Սա արդեն վեցերորդ մրցաշրջանն է, երբ թիմը չեմպիոն է դառնում՝ խփելով ավելի քան 100 գոլ։ 2020/21 մրցաշրջանում նրանք դարձել են 167 գոլի հեղինակ, որին հաջորդել են 159 (2021/22), 137 (2022/23), 118 (2023/24) և 137 (2024/25) գոլերը։ Ընթացիկ մրցաշրջանում կատալոնացիներն արդեն խփել են 116 գնդակ, ընդ որում՝ առաջնության ավարտին դեռ 5 հանդիպում կա։

Բացի հզոր հարձակման գծից, Պերե Ռոմեուի թիմը փայլում է նաև պաշտպանությունում. սա 7-րդ անընդմեջ չեմպիոնությունն է, որի ընթացքում թիմը բաց է թողնում ընդամենը 15 կամ ավելի քիչ գնդակ։

Ալեքսիան՝ բացարձակ ռեկորդակիր

Թիմի վերջին հաջողությունների գլխավոր կերտողներից է Ալեքսիա Պուտելյասը։ Կատալոնացի կիսապաշտպանը թիմի կազմում ամենաշատ տիտղոս նվաճած ֆուտբոլիստն է (9 չեմպիոնություն)՝ առաջ անցնելով «բլաուգրանայի» մեկ այլ լեգենդից՝ Այտանա Բոնմատիից, ով ունի 7 ոսկե մեդալ։