Վան Ին Աբբաս Արաղչիի հետ հեռախոսազրույցում վերահաստատել է, որ Պեկինը մշտապես սատարում է Իրանի ինքնիշխանությանը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Պեկինը մշտապես սատարում է Իրանի ինքնիշխանության, անվտանգության և ազգային արժանապատվության պաշտպանությանն ուղղված ջանքերին: Այս մասին Իրանի ԱԳ նախարար Աբբաս Արաղչիի հետ հեռախոսազրույցում ասել է Չինաստանի ԱԳ նախարար Վան Ին, հայտնում է ՏԱՍՍ-ը:

«Անհրաժեշտ է հարգել և պաշտպանել Իրանի ինքնիշխանությունը, անվտանգությունը և օրինական իրավունքները՝ որպես Հորմուզի նեղուցի ափին գտնվող պետություն: Միևնույն ժամանակ, անհրաժեշտ է ապահովել նավագնացության ազատությունն ու անվտանգությունն այս միջազգային նեղուցում»,- ասել է Վան Ին:

Ինչպես հստակեցրել է չինացի դիվանագետը, Հորմուզի նեղուցում բնականոն նավագնացության վերականգնման ձգտումը միջազգային հանրության միասնական կոչն է։ Նրա խոսքով՝ Չինաստանը պատրաստ է, ՉԺՀ նախագահ Սի Ծինփինի՝ հակամարտության կարգավորման վերաբերյալ առաջարկներին համապատասխան, նպաստել լարվածության նվազեցմանը, տարածաշրջանի երկրների միջև հարաբերությունների բարելավմանը և կառուցողական դեր խաղալ Մերձավոր Արևելքում վերջնականապես տևական խաղաղության և կայունության հասնելու համար։

«Այժմ պատերազմից դեպի խաղաղություն անցման վճռորոշ փուլն է, խաղաղության հնարավորությունների պատուհանը բաց է: Չինաստանը սատարում է կրակի դադարեցման և բանակցությունների անցկացման միտման պահպանումը։ Դա համապատասխանում է իրանցի ժողովրդի հիմնարար շահերին, տարածաշրջանի երկրների և միջազգային հանրության ընդհանուր սպասումներին»,- ընդգծել է նախարարը։ 

Ինչպես նշվում է, Արաղչին Չինաստանի ԱԳՆ ղեկավարին տեղեկացրել է իրանա-ամերիկյան բանակցություններում տիրող իրավիճակի, ինչպես նաև Թեհրանի հետագա գործողությունների ծրագրերի մասին։ Նրա խոսքով՝ Իրանը ձգտելու է ճգնաժամային իրավիճակի ողջամիտ և իրատեսական կարգավորմանը՝ խաղաղ երկխոսության միջոցով։

Բացի այդ, Արաղչին բարձր է գնահատել այն ջանքերը, որոնք Չինաստանը գործադրում է դեէսկալացիայի համար։ Ինչպես նշվում է, նա հույս է հայտնել, որ Պեկինը դրական դեր կխաղա խաղաղության վերականգնման և ռազմական գործողությունների դադարեցման հարցում։

Հետևեք մեզ՝ այստեղ