«Իմ գույնը կարևոր է». լուսանկարչական նախագիծ՝ նվիրված Արվեստի համաշխարհային օրվան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին                     

ԿԳՄՍՆ Երեխաների հատուկ ստեղծագործական կենտրոնն Արվեստի համաշխարհային օրվա շրջանակում իրականացնում է «Իմ գույնը կարևոր է» խորագրով լուսանկարչական նախագիծը՝ ևս մեկ անգամ կարևորելով մշակութային կրթության, ներառականության և հավասարության արժեքները։ Լուսանկարչական նախագծում ներկայացված են կենտրոնի սաները, որոնցից յուրաքանչյուրն իր յուրահատուկ գույնն է հաղորդում արվեստի աշխարհին։ Հենց այս գաղափարից էլ ծնվել է նախագծի անվանումը՝ ընդգծելով, որ յուրաքանչյուր երեխայի ստեղծագործական ինքնարտահայտումը կարևոր է և անփոխարինելի։ Այս մասին տեղեկացնում են ԿԳՄՍՆ-ից:

Նախագծի լուսանկարները հանրությանը կներկայացվեն նաև հանրային տարբեր վայրերում։ Դրանք ուղեկցվում են մշակույթի, հավասարության և ներառականության մասին ուղերձներով, որոնք, վստահաբար, անտարբեր չեն թողնի արվեստասեր հասարակությանը։

«Մեր կենտրոնի յուրաքանչյուր սան արվեստի միջոցով արտահայտում է իր ներաշխարհը, իր զգացողություններն ու երազանքները։ «Իմ գույնը կարևոր է» խորագրով նախագիծը հենց այդ մասին է՝ յուրաքանչյուր երեխայի անհատականությունը, նրա ձայնն ու գույնը տեսանելի դարձնելու մասին։ Մենք հավատում ենք, որ արվեստը միավորում է, ուժ է տալիս և ստեղծում հավասար հնարավորություններ բոլորի համար»,- նշում է կենտրոնի տնօրեն Աննա Կարապետյանը։

Նրա խոսքով՝ կենտրոնի առաքելությունն է ձևավորել այնպիսի միջավայր, որտեղ տարբերությունները ոչ թե բաժանում, այլ հարստացնում են հասարակությունը՝ նպաստելով փոխադարձ հարգանքի, մարդասիրության և քաղաքակրթական արժեքների ամրապնդմանը։

Արդեն 35 տարի կենտրոնն իրականացնում է իր բացառիկ առաքելությունը՝ ապահովելով անվճար գեղարվեստական կրթություն զարգացման տարբեր առանձնահատկություններ ունեցող, սոցիալապես անապահով և կրթության առանձնահատուկ պայմանների կարիք ունեցող շուրջ 960 երեխայի համար։

Կենտրոնի 148 ստեղծագործական խմբերը, որոնք գործում են Երևանում և մարզերում, դարձել են այն կարևոր հարթակը, որտեղ բազմազան կարիքներ ունեցող խմբերի երեխաները գտնում են ինքնահաստատման ուղին և սոցիալական ներառման իրական հնարավորությունը։

Այս տարի կենտրոնը նշում է իր գործունեության հոբելյանական՝ 35-ամյակը, ինչը կարևոր առիթ է վերահաստատելու իր հանձնառությունը՝ ներառական կրթության և մշակութային զարգացման սկզբունքներին։

«Մեզ համար շատ կարևոր է, որ հասարակությունը ոչ միայն տեսնի երեխաների ստեղծագործական ներուժը, այլև զգա, որ նրանցից յուրաքանչյուրն ունի իր առանձնահատուկ տեղն ու դերը մեր մշակութային կյանքում»,- ասել է կենտրոնի տնօրեն Աննա Կարապետյանը։

Հետևեք մեզ՝ այստեղ