«Հայաստանն իմ հայրենիքն է, իմ արմատների մի մասն է». ջութակահար Արա Մալիկյանն անհամբերությամբ է սպասում երևանյան համերգին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Իսպանաբնակ ջութակահար Արա Մալիկյանի երևանյան համերգը, որը պետք է կայանար ապրիլի 9-ին, երաժշտի առողջական խնդիրների պատճառով հետաձգվել է. սպասված երեկոն տեղի կունենա մայիսի 19-ին Կարեն Դեմիրճյանի անվան մարզահամերգային համալիրում։ Ձեռք բերված բոլոր տոմսերը կմնան ուժի մեջ։

Մալիկյանն ափսոսում է, որ ստիպված են եղել հետաձգել համերգն ու խոստովանում է, որ անհամբեր սպասում է Հայաստանի երկրպագուների հետ հանդիպմանը, քանի որ հայ հանդիսատեսի ջերմությունն ու անկեղծությունն առանձնահատուկ են։

«Հայաստան վերադարձն ինձ համար պարզապես աշխատանքային այց չէ. այն խորապես անձնական նշանակություն ունի։ Հայաստանն իմ հայրենիքն է, իմ արմատների մի մասն է։ Ամեն անգամ Հայաստան գալիս մի յուրահատուկ զգացում եմ ունենում. կարծես վերադառնում եմ տուն»,- նշում է ջութակահարն ու հավելում՝ աշխարհի տարբեր բեմերում ելույթ ունենալը մեծ երջանկություն է, բայց Հայաստանի հանդիսատեսը ոչ միայն լսում է երաժշտությունը, այլև ապրում է դրանով, իսկ այդ զգացմունքային խորությունն ու անկեղծությունը հազվադեպ երևույթներ են։

Հայաստանյան բեմում իրեն պարզապես արտիստ չի զգում, այլ մեծ ընտանիքի մի մաս։

Մալիկյանի Intruso World Tour-ի շրջանակում կազմակերպված երևանյան համերգին ջութակահարի հետ բեմում կլինեն երաժիշտներ, որոնց հետ երկար ճանապարհ է անցել։ Նրանք են դաշնակահար Իվան «Մելոն» Լյուիսը, կոնտրաբասահար Իվան Ռուիս Մաչադոն, թմբկահար Գեորվիս Պիկո Միլանը, կիթառահար Դայան Աբադը:

Նույն երաժիշտների հետ Մալիկյանը երևանյան բեմում ելույթ է ունեցել 2023 և 2024  թվականներին՝ անմոռանալի հիշողություններ նվիրելով հանդիսատեսին:

«Սպասվող համերգային երեկոն յուրահատուկ է լինելու՝ լի տարբեր հույզերով, երաժշտությամբ և կենդանի էներգիայով։ Մենք պատրաստել ենք մի ծրագիր, որը միավորում է յուրահատուկ աշխարհներն ու պատմությունները։ Իհարկե, առանց անակնկալների չի լինի, բայց ամենամեծ անակնկալը հենց այն կապն է, որը ստեղծվում է երաժիշտների և երաժշտասերների միջև»,-նշում է ջութակահարը։

Ասում է՝ Intruso-ն ներքին ճանապարհորդություն է. պատմում է այն պահերի մասին, երբ քեզ օտար ես զգում աշխարհում, նույնիսկ՝ ինքդ քեզ հետ, բայց այդ օտարությունը վերածվում է ստեղծագործության. հենց այդ ապրումներից է ծնվում երաժշտությունը։

«Ուզում եմ, որ մարդիկ այդ պատմության մեջ տեսնեն նաև իրենց։ Կարծում եմ՝ բոլորս երբեմն մեզ intruso ենք զգում»,-ընդգծում է երաժիշտը։

Հետևեք մեզ՝ այստեղ