Մուլտֆիլմի լեզվով՝ հայկականի մասին. արցախցի երիտասարդները մեծ անիմացիոն աշխարհ են ստեղծում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին                     

Մուլտֆիլմը դարձել է աշխարհի ամենակարևոր լեզուն և մենք հենց այդ լեզվով ենք ուզում խոսել հայկականի մասին, որպեսզի մեր միտքը հասցնենք միլիոնավոր երեխաների։ Այս մասին «Փաստինֆո»-ի հետ զրույցում ասել է «Արթևեր» Հայկական մուլտֆիլմերի ստեղծման և տարածման ՀԿ հիմնադիր Նարեկ Սարգսյանը։

Արցախից Հայաստան տեղափոխվելուց հետո անիմացիան Նարեկի և ընկերների համար առօրյա հոգսերից կտրվելու զբաղմունք էր։ Ժամանակի ընթացքում հասկացան, որ հոբբին կարող է դառնալ շատ մեծ նախագծի հիմք։

«Երբ մենք փոքր էինք, մեր ծնողները մեզ հեքիաթներ էին պատմում, այդ պատմությունները մեզ տալիս էին ուժ, հավատ բարության հանդեպ և ջերմացնում էին մեր հոգին։ Սակայն այսօր իրավիճակն ուրիշ է»,- պատմեց Նարեկը։

Նա շեշտեց, որ այսօր երեխաներն այլևս չեն լսում այդ հեքիաթները։ Նրանք դիտում են օտար մուլտֆիլմեր և լսում օտար կոնտենտ, ինչի հետևանքով հեռանում են հայկական մշակույթից և արմատներից։

«Մեր քայլերը մեկ տարի առաջ ենք սկսել՝ երեք ընկերներով։ Նախագիծն առաջ տանելու համար սկսել ենք անիմացիոն տարբեր գաղափարներ փորձարկել, ոլորտի մարդկանց հետ հանդիպել։ Այժմ մեր թիմը բաղկացած է յոթ հոգուց»,- ասաց նա։

Նարեկը ֆոտոլուսանկարիչ է։ Ընկերները ևս մասնագիտությամբ անիմատոր չեն, բայց նրանք արդեն ունեն բավական ունակություններ՝ իրենց գաղափարներն իրագործելու համար։ Նրանք համագործակցում են հոգեբանների, մանկավարժների ու ազգագրագետի հետ, որպեսզի մուլտֆիլմերը ոչ միայն փոխանցեն հայկական մշակույթը, այլ զարգացնեն երեխայի խոսքը, մտածողությունը և ինքնավստահությունը։

««Արտթևերը» ուղղակի մուլտֆիլմ չի լինելու, այն փորձ է վերադարձնել փոքրիկներին իրենց արմատներին, անկախ նրանից, թե որտեղ են նրանք ապրում։ Մենք նոր կյանք ենք տալիս հին հեքիաթներին՝ ժամանակակից մատուցմամբ։ Ստեղծում ենք նոր հերոսներ, ցույց ենք տալիս մեր բնությունը, մեր երաժշտությունը ու մեր արժեքները՝ բարություն, խիզախություն ու ընտանիքի կարևորություն։ Մեծ ուշադրություն ենք դարձնելու հայկական լոկացիաներին ու սիմվոլներին, հագուստին ու տարազին»,- ասաց Նարեկը։

Առաջիկա 1.5 տարում երիտասարդները նախատեսում են ստեղծել 27 մուլտֆիլմ, 12-ը՝ երկար, 15-ը՝ կարճ։ 

Հետևեք մեզ՝ այստեղ