Հայ բռնցքամարտիկները սկսել են պայքարը Սամսունում

Թուրքիայի Սամսուն քաղաքում մեկնարկած՝ օլիմպիական խաղերի վարկանշային մրցաշարում Հայաստանի հավաքականի 3 անդամներ արդեն մենամարտի են մասնակցել: «Արմենպրես»-ը հայտնում է, որ առաջինը ռինգ է դուրս եկել Հայաստանի միակ ներկայացուցիչը կանանց բռնցքամարտում: 51 կգ քաշային կարգում Անուշ Գրիգորյանի մրցակիցը հույն մարզո ւհի էր: Հայուհին կարողացավ հաղթահարել մրցակցի արգելքը և անցնել հաջորդ փուլ:

Ապրիլի 9-ին ռինգ դուրս եկան նաև 64 կգ քաշային Հովհաննես Բաչկովը և 91 կգ քաշային Ռաֆայել Սիմոնյանը: Բաչկովին հաջողվեց բելգիացի մրցակցին հաղթել մեծ առավելությամբ, իսկ ահա Սիմոնյանը ցավալի պարտություն կրեց Բուլղարիայի ներկայացուցչից:

Արդեն հայտնի է, որ կանանց բռնցքամարտի հաջորդ փուլում Անուշ Գրիգոյանը մրցելու է Ռումինիան ներկայացնող Պերիջոչ Լակրամիոարայի հետ: Բաչկովն էլ իր մենամարտը կանցկացնի Իտալիայի ներկայացուցիչ Վինչենցո Արեչիայի դեմ: Երկու մենամարտներն էլ տեղի կունենան ապրիլի 11-ին:

Ապրիլի 10-ին ռինգ դուրս կգան Հայաստանի երկու ներկայացուցիչներ՝ 60 կգ քաշային Սամվել Բարսեղյանը և 75 կգ քաշային Արման Հովիկյանը: Բարսեղյանի մրցակիցը կլինի Գերմանիան ներկայացնող Ռոբերտ Հարությունյանը, իսկ Հովիկյանին կդիմակայի Իտալիայի ներկայացուցիչը: Հետաքրքիր է, որ 60 կգ քաշային կարգում Վրաստանը և Բելառուսը ներկայացնում են ևս հայ բռնցքամարտիկներ՝ Օթար Երանոսյանը և Վազգեն Սաֆարյանցը: