Իսայելում հայերի շրջանում վնասներ ու զոհեր չկան, թեև բավական լարված գիշեր ենք անցկացրել. Չերնամորյան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին                     

 «Այս գիշեր բավական լարված ենք անցկացրել։ Ճիշտ է՝ հատկապես մեր՝ հայ համայնքում զոհեր և վիրավորներ չկան, և ընդհանրապես զոհերի թիվը մեծ չէ, բայց խնդիրն այն է, որ գիշերվա ընթացքում երեք անգամ օդային տագնապ ենք ունեցել, ինչը նշանակում է, որ անվտանգության նկատառումներից ելնելով չենք քնում, ստիպված ենք լինում ապաստարան իջնել», -այս մասին «Փաստինֆո»-ին ասաց Իսրայելի հայազգի բնակիչ Արտյոմ Չերնամորյանը։

Նրա խոսքով՝ հատկապես երկրի  հյուսիսային շրջաններն են թիրախավորվում։

«Ցավոք, «Հեզբոլլահը» նույնպես մտավ պատերազմական գործողությունների մեջ, մենք հյուսիսում ունենք 3000 բնակչություն։ Երկրի հյուսիսային քաղաքների և Հայֆա քաղաքի հոգևոր հովիվ Տեր Տիրայր քահանա Հովակիմյանի հետ եմ խոսել, ասաց, որ իրավիճակը նույնն է։ Մենք ունենք ինտերնետային հավելվածներ, որտեղ հայերը ամեն հրթիռահարումից հետո գրում են, թե ով ինչպես է, ինչ խնդիր ունի։ Այս պահի դրությամբ, բարեբախտաբար, հայերի շրջանում տուժածներ չկան»,- նշել է մեր զրուցակիցը՝ ավելացնելով, որ  2023 թվականին  2 զոհ է ունեցել հայ համայնքը և աղոթում են, որ այլևս նման ծանր կորուստներ չունենան։  

Իսրայելում բնակչությունը հաշվում է պատերազմի 20-րդ օրը։ Հիմնականում Իրանի կողմից թիրախավորվում է երկրի կենտրոնը․ շատ մեծ բալիստիկ հրթիռներ են օգտագործվում, որոնց մեջ մանր արկեր կան, և եթե մարդիկ անտեսեն ու չիջնեն ապաստարաններ, շատ զոհեր կլինեն։ Խնդիրն այն է, որ մարդիկ բավական կազմակերպված են իջնում ապաստարաններ։ Մինչ օրս, իր տվյալներով, 15 զոհ է եղել, և դրանք այն անձինք են, ովքեր կամ անտեսել են ապաստարան իջնելու անհրաժեշտությունը, կամ չեն հասցրել։
«Լինում են դեպքեր, երբ շենքերը վնասվում են, մեքենաներ են այրվում, սակայն, պատերազմը սկսվելուց առաջ Իսրայելի կառավարությունը շատ կազմակերպված հաշվարկել է ազգաբնակչության պաշտպանության և սոցիալական առաջացող հարցերը։ Նյութական վնասները փոխհատուցվում են, բնակարանի կորստի դեպքում մարդկանց տեղափոխում են ապահով վայրեր՝ հյուրանոցներ, ապահովում են սնունդով, վճարում են վարձավճարը։ Նախորդ պատերազմից բնակիչները գիտեն, որ պատերազմի ավարտից հետո իրենց տրվելու է նույն մակերեսով բնակարան։ Այդ պատճառով քաղաքացիների մեջ առանձնապես սպասողական վիճակ է, բայց ներքաղաքական լարվածություն չկա»,- վստահեցնում է Իսրայելի քաղաքացին:

Նա նաև տեղեկացրեց, որ վերջերս հայ համայնքի հետ կապված մի սադրանք է տեղի ունեցել։ Իսրայելի «Օցմա Յեհուդիտ» կուսակցության հետ կապված,  որը ղեկավարում է Իտամար Բեն-Գվիրը՝ երկրի ներքին գործերի նախարարը, որին ենթարկվում են նաև սահմանապահ ուժերը։ Նա բավական կասկածելի քրեական անցյալ ունեցող անձ է, բայց ընտրություններին բավական ձայներ է հավաքել և ընդգրկված է Նեթանյահուի կառավարության կազմում։ Նա օրթոդոքս, ծայրահեղ ազգայնական հայացքներ ունեցող գործիչ է, որին ազգաբնակչության մեծ մասը չի սիրում։

Այս կուսակցության անդամներից  Կնեսետի պատգամավորներից մեկը  գնացել է Երուսաղեմում գտնվող «Կովերի պարտեզ», զրույց ունեցել Հայկական թաղամասի և պարտեզի պահապան տղաների հետ, ովքեր շատ հանգիստ կերպով նրան դուրս են հրավիրել տարածքից՝ հիշեցնելով, որ պատրիարքարանի այդ վիճահարույց գործարքը քննարկվում է դատարանում։ Բացի այդ, կա նաև մեկ այլ դատական գործ Երուսաղեմի քաղաքապետարանի դեմ։
Ամեն ինչ արվել է շատ քաղաքակիրթ եղանակով, սակայն, տվյալ ուժի ներկայացուցիչը Կնեսետում ելույթ է ունեցել և փորձել է վարկաբեկել հայ համայնքը՝ ստելով, թե իրեն սպառնացել են, նույնիսկ իբր սպանելու սպառնալիքներ են հնչեցրել։ Դա է տեղի ունեցել հայ համայնքի հետ կապված»:
Այլ խնդիրներ այս պահին, ըստ Իսրայելում բնակվող հայի, հայերը չունեն․ նրանք, ինչպես մյուս քաղաքացիները, սպասում և աղոթում են, որ այլևս զոհեր չլինեն, քանի որ նախորդ պատերազմում 3 հայ զոհ եղել էր։
Ինչ վերաբերում է պատերազմի ավարտին, ըստ Չեռնամորյանի, Իսրայելում կանխատեսում են, որ մինչև ապրիլի կեսերը պատերազմը չի ավարտվելու։ Թեև ապրիլին հրեաների ամենից կարևոր տոնն է, և աշխարհի տարբեր կողմերից հրեաները սիրում են գալ և հայրենիքում տոնել, դա էլ չի ստիպելու շուտափույթ ավարտել պատերազմը։ Մարդիկ կանխատեսում են, որ դեռ պետք է համբերեն։

Հետևեք մեզ՝ այստեղ