Լավագույն հայ ըմբիշը վարկանիշային նահանջ է գրանցել

Ըմբշամարտի համաշխարհային միությունը ներկայացրել է աշխարհի ուժեղագույն ըմբիշների թարմացված վարկանիշային աղյուսակը:

«Արմենպրես»-ը, վկայակոչելով վերոնշյալ վարկանշային աղյուսակը հրապարակող միության պաշտոնական կայքը, հայտնում է, որ վերջին տարիներին Հայաստանի լավագույն մարզիկներից մեկը` Աշխարհի կրկնակի, Եվրոպայի եռակի, օլիմպիական խաղերի բրոնզե մեդալակիր, ինչպես նաև 2016 թ. Եվրոպայի առաջնության փոխչեմպիոն Արթուր Ալեքսանյանը վերջին երկու տարում առաջին անգամ  զիջել է ուժեղագույնի դիրքը` այն հանձնելով միակ ըմբիշին, ում այդ ընթացքում պարտվել է` Նիկիտա Մելնիկովին (Ռուսաստան):

Ըստ քաշայաին կարգերի հրապարակված վարկանիշային աղյուսակում` 59 կգ քաշային կարգում է Հայաստանի ներկայացուցիչ Ռոման Ամոյանը, ով Ռիգայում դարձավ Եվրոպայի փոխչեմպիոն: Նա զբաղեցնում է 15-րդ հորիզոնականը:

Վարկանիշային աղյուսակում Հայաստանը ներկայացնող մյուս ըմբիշը Միհրան Հարությունյանն է, ով 7-րդ տեղում է 66 կգ  քաշային կարգում: 71 կգ քաշային կարգում երկու հայ ըմբիշներ կան. Ուկրաինան ներկայացնող Արմեն Վարդանյանը 2-րդ տեղում է, իսկ Հայաստանը ներկայացնող Վարշամ Բորանյանը` 10-րդ:

75 կգ քաշային կարգում լավագույնը Ռուսաստանի ներկայացուցիչ Ռոման Վլասովն է: Այս քաշային կարգում մրցելույթներ ունեցող Աշխարհի և Եվրոպայի նախկին չեմպիոն, 2012 թ. օլիմպիական խաղերի արծաթե մեդալակիր Արսեն Ջուլֆալակյանը զբաղեցնում է 11-րդ, իսկ Եվրոպայի առաջնության փոխչեմպիոն Կարապետ Չալյանը՝ 12-րդ հորիզոնականը:

80 կգ քաշային կարգում Հայաստանի ներկայացուցիչ Ռաֆիկ Մանուկյանը 19-րդն է, իսկ լավագույնն այս քաշային կարգում Սելջուկ Ցեբին (Թուրքիա) է:

Հայաստանը ներկայացնող ազատ ոճային ըմբշամարտիկներ Լևան Բերիանիձեն (125 կգ քաշային կարգ) 9-րդ հորիզոնականում է, իսկ Վալոդյա Ֆրանգուլյանը (61 կգ քաշային կարգ) զբաղեցնում է 10-րդ տեղը: Կանանց վարկանիշային աղյուսակում հայ մարզուհիներ ընդգրկված չեն:

Ըմբշամարտի համաշխարհային միությունը վարկանիշային աղյուսակը թարմացրել էր` գլխավորապես հիմք ընդունելով Ռիգայում կայացած Եվրոպայի առաջնության արդյունքները: