ՉԼ․ Մադրիդի «Ռեալը», ՊՍԺ-ն և «Արսենալը» դուրս եկան քառորդ եզրափակիչ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին   

Չեմպիոնների լիգայի 2025/26 թթ. խաղարկության 1/8 եզրափակչի պատասխան խաղում Մադրիդի «Ռեալը» հյուրընկալվելիս դրամատիկ պայքարում 2-1 հաշվով առավելության հասավ «Մանչեսթեր Սիթիի» նկատմամբ:

​Հանդիպման 20-րդ րոպեին տանտերերի առաջ դրված խնդիրն էլ ավելի բարդացավ. միտումնավոր ձեռքով խաղի համար կարմիր քարտով խաղադաշտից հեռացվեց «Սիթիի» ավագ Բեռնարդու Սիլվան: Դրա արդյունքում նշանակված 11 մետրանոցը հստակ իրացրեց Վինիսիուսը՝ բացելով խաղի հաշիվը։ «Քաղաքայինների» պատասխան գոլը 41-րդ րոպեին հեղինակեց Էրլինգ Հոլանդը՝ վերականգնելով հավասարությունն այս հանդիպումում։ Թվում էր՝ խաղն այդպես էլ կավարտվի, սակայն հիմնական ժամանակին ավելացված 90+4-րդ րոպեին Վինիսիուսը դարձավ դուբլի հեղինակ՝ խփելով մադրիդցիների հաղթական գոլը։

​Հիշեցնենք, որ դիմակայության առաջին խաղում տոնած 3-0 հաշվով տպավորիչ հաղթանակի շնորհիվ մադրիդցիներն արդեն իսկ մեծ առավելություն ունեին, և երկու խաղերի ընդհանուր 5-1 արդյունքով վստահորեն նվաճեցին հաջորդ փուլի ուղեգիր։

​Քառորդ եզրափակչում «Ռեալը» կհանդիպի «Բավարիա» — «Ատալանտա» զույգի հաղթողին։

Կայացան Չեմպիոնների լիգայի 2025/26 մրցաշրջանի 1/8 եզրափակչի ևս երկու պատասխան հանդիպումներ։ Ֆրանսիական ՊՍԺ-ն և լոնդոնյան «Արսենալը» վստահ խաղով հաղթահարեցին իրենց արգելքներն ու դուրս եկան մրցաշարի քառորդ եզրափակիչ։

ՊՍԺ-ն կրկին անգութ գտնվեց «Չելսիի» նկատմամբ։ Լոնդոնի «Սթեմֆորդ Բրիջ» մարզադաշտում «Չելսին» հյուրընկալել էր ՊՍԺ-ին։ Առաջին խաղում կրած 2:5 հաշվով ցավալի պարտությունից հետո անգլիական ակումբը չկարողացավ բեկել դիմակայության ընթացքը։ Փարիզեցիները կրկին վստահ հաղթանակ տարան՝ այս անգամ 3:0 հաշվով (երկու խաղերի արդյունքում՝ 8:2)։

Խաղասկզբում հաշիվը բացեց հյուրերի հարձակվող Խվիչա Կվարացխելիան, իսկ արդեն 15-րդ րոպեին վինգեր Բրեդլի Բարքոլան կրկնապատկեց առավելությունը։ Երկրորդ խաղակեսում՝ 62-րդ րոպեին, ֆրանսիական գրանդի հարձակվող Սենի Մայուլուն հաշիվը դարձրեց խոշոր:

ՉԼ-ի ընդհանուր փուլում «Չելսին» վաստակել էր 16 միավոր՝ զբաղեցնելով 6-րդ հորիզոնականը, իսկ ՊՍԺ-ն փլեյ-օֆֆ փուլում 5:4 ընդհանուր հաշվով պայքարից դուրս էր թողել «Մոնակոյին»:

Մյուս դիմակայությունում Լոնդոնի «Արսենալը» «Էմիրեյթս» մարզադաշտում ուժերը չափեց Լևերկուզենի «Բայերի» հետ: Գերմանիայում կայացած առաջին խաղում գրանցվել էր 1:1 հաշիվը, իսկ ահա պատասխան խաղում անգլիական ակումբն առավելության հասավ 2:0 հաշվով։

36-րդ րոպեին «զինագործների» վինգեր Էբերեչի Էզեն տուգանային հրապարակի սահմաններից դուրս կատարած շքեղ շրջադարձ հարվածով բացեց հաշիվը: 63-րդ րոպեին Դեկլան Ռայսը կրկնապատկեց այն՝ վերջակետ դնելով այս դիմակայությանը։

Այսպիսով, «Արսենալը» նվաճեց Չեմպիոնների լիգայի 1/4 եզրափակչի ուղեգիր, որտեղ կմրցի Լիսաբոնի «Սպորտինգի» հետ, իսկ Լևերկուզենի «Բայերը» լքեց մրցաշարը։

Հետևեք մեզ՝ այստեղ