Հայ բռնցքամարտիկները Թուրքիա կմեկնեն Օլիմպիական ուղեգրերի հետևից

Հայ բռնցքամարտիկները կմեկնեն Թուրքիայի Սամսուն քաղաք՝ մասնակցելու օլիմպիական վարկանիշային մրցաշարին: «Արմենպրես»-ը, վկայակոչելով Հայաստանի բռնցքամարտի ֆեդերացիայի լրատվական ծառայությանը, հայտնում է, որ բռնցքամարտի Հայաստանի հավաքականը կմասնակցի ապրիլի 7-ից 18-ը կայանալիք խոշոր մրցաշարի՝ փորձելով Ռիոյում ամռանը կայանալիք օլիմպիական խաղերի ուղեգրեր նվաճել:

Ավելի վաղ Հայաստանի բռնցքամարտի ֆեդերացիայի նախագահ Արթուր Գևորգյանը պաշտոնապես հայտնել էր, թե հայ բռնցքամարտիկները չեն մասնակցելու նախ Թուրքիայում, ապա նաեւ այս տարվա հունիսին՝ Ադրբեջանում կայանալիք օլիմպիական վարկանիշային մրցաշարերին. Հայաստանի բռնցքամարտի ֆեդերացիայի նախագահ Արթուր Գևորգյանը հայտարարել էր. «Հաշվի առնելով ներկա պատերազմական վիճակը՝ ակնհայտ է, որ որպես ՀՀ բռնցքամարտի ֆեդերացիայի նախագահ ես թույլ չեմ տա մեր մարզիկներին մասնակցել առաջիկա օլիմպիական վարկանիշային մրցաշարերին, քանի որ դրանք տեղի են ունենալու Թուրքիայում և Ադրբեջանում։ Ամենից կարևորը հայ քաղաքացու կյանքի անվտանգությունն է: Համոզված եմ, որ հայ մարզասերը մեզ կհասկանա»:

Սակայն, հետագայում ՀՕԱԿ-ի հետ քննարկումների արդյունքում նոր որոշում է կայացվել, ըստ որի՝ այնուամենայնիվ, գլխավոր մարզիչ Կարեն Աղամալյանի ղեկավարությամբ Հայաստանի հավաքականի բռնցքամարտիկները կմասնակցեն Թուրքիայի Սամսունում տեղի ունենալիք վարկանիշային մրցաշարին՝ նպատակ ունենալով հնարավորինս լավ արդյունքներ գրանցել եւ արդարացնել նախաօլիմպիական քառամյա շրջափուլի ակտիվ աշխատանքը:

Հայաստանի ազգային օլիմպիական կոմիտեի լրատվական բաժնի հետ զրույցում ՀԱՕԿ նախագահի տեղակալ Դերենիկ Գաբրիելյանը ասաց, որ այդ որոշումը վերանայվել է:

«Հայաստանի բռնցքամարտի ֆեդերացիայի նախագահը Հայաստանում չէ, ինքս չեմ կարող ասել, թե արդյո՞ք այդ որոշումը նախապես համաձայնեցված է եղել: Տարածված հայտարարությունից հետո ես անձամբ զրուցել եմ նրա հետ: Բռնցքամարտի ֆեդերացիայի նախագահն իր մտավախությունն ունի հայ մարզիկների անվտանգության համար, քանի որ Սամսունի մրցաշարին ադրբեջանցի մարզիկներ էլ պետք է մասնակցեն: Նրա դիրքորոշումը կարելի է հասկանալ: ՀԱՕԿ նախագահ Գագիկ Ծառուկյանն արդեն հանդիպել է մարզիչների հետ և անձամբ զրուցել է Գևորգյանի հետ: Նրանք եկել են վերջնական որոշմանը, ըստ որի Õ �այ բռնցքամարտիկները կմասնակցեն Սամսունում կայանալիք  վարկանիշային մրցաշարին: Կողմերը եկել են համաձայնության, և խնդիրը լուծված եմ համարում: Այժմ մնում է միայն լավ մասնակցություն ունենալ»,- հայտարարել է Դերենիկ Գաբրիելյանը:

Արդեն հայտնի է նաեւ, թե ապրիլի 7-ից 18-ը ովքեր կմեկնեն Սամսուն՝ բարձր պահելու հայկական բռնցքամարտի պատիվը: Մրցաշարում Հայաստանը կներկայանա 10 մարզիկով՝ Արթուր Հովհաննիսյան (49 կգ), Նարեկ Աբգարյան (52 կգ), Արամ Ավագյան (56 կգ), Սամվել Բարսեղյան (60 կգ), Հովհաննես Բաչկով (64 կգ), Վլադիմիր Մարգարյան (69 կգ), Արման Հովիկյան (75 կգ), Նիկոլ Հարությունով (81կգ), Ռաֆայել Սիմոնյան (91+ կգ) և Անուշ Գրիգորյան (51 կգ):

«Բռնցքամարտիկները շատ մարտական տրամադրություն ունեն: Վախի կամ տագնապի զգացում նրանց մոտ ի սկզբանե չի եղել»,- հայտարարել է Հայաստանի բռնցքամարտի հավաքականի գլխավոր մարզիչ Կարեն Աղամալյանը:

Սամսունում կայանալիք վարկանիշային մրցաշարում օլիմպիական ուղեգրի կարժանանան տղամարդկանց 10 քաշային կարգերից յուրաքանչյուրում 3-ական մարզիկ՝ 1-ինից 3-րդ տեղերը գրաված մարզիկները, ընդ որում՝ կիսաեզրափակչում անհաջողության մատնված բռնցքամատիկները ևս մեկ լրացուցիչ մենամարտ կանցկացնեն 3-րդ տեղի և օլիմպիական ուղեգրի համար: Կանանց մրցաշարի դեպքում 3 քաշային՝ 51 կգ, 60 կգ և 75 կգ կարգերից յուրաքանչյուրում օլիմպիական ուղեգրի կարժանանա միայն եզրափակչում մրցողները:

Ընդհանուր առմամբ Սամսունի օլիմպիական վարկանշային մրցաշարում 36 օլիմպիական ուղեգիր է վիճարկվելու՝ տղամարդկանց դեպքում՝ 30, կանանց՝ 6:

Ինչ վերաբերում է Ադրբեջանում հունիսին կայանալիք վարկանշային մրցաշարին, ապա այդ մասին ընդունված որոշումը դեռ չի վերանայվել. Հայաստանը չի մասնակցելու այդ մրցաշարին: