ՉԼ․ «Բավարիան» ու «Ատլետիկոն» հաղթանակներ տարան, «Բարսելոնան» ոչ-ոքի խաղաց «Նյուքասլի» հետ․ այլ արդյունքներ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մադրիդի «Սիվիտաս Մետրոպոլիտանո» մարզադաշտում կայացած խաղում «Ատլետիկոն» վստահ հաղթանակ տարավ Լոնդոնի «Տոտենհեմի» նկատմամբ՝ 5:2։

Մադրիդյան ակումբն անհավանական մեկնարկ ունեցավ՝ մինչև 22-րդ րոպեն խփելով 4 գնդակ։ Գոլերի հեղինակ դարձան Մարկոս Լյորենտեն, Անտուան Գրիզմանը, Խուլիան Ալվարեսը և Ռոբեն Լե Նորմանը։

Հյուրերի կազմում 26-րդ րոպեին հաշվի տարբերությունը կրճատեց Պեդրո Պորոն, սակայն 55-րդ րոպեին Ալվարեսը դուբլ ձևակերպեց՝ վերականգնելով 4 գնդակի առավելությունը։ Անգլիական ակումբի երկրորդ գոլը 76-րդ րոպեին խփեց Դոմինիկ Սոլանկեն։

Հիշեցնենք, որ «Տոտենհեմը» ՉԼ հիմնական փուլում 17 միավորով զբաղեցրել էր 4-րդ տեղը, իսկ «Ատլետիկոն» փլեյ-օֆֆում երկու խաղերի արդյունքով (7:4) հաղթահարել էր «Բրյուգեի» արգելքը։

Այս զույգի պատասխան հանդիպումը նույնպես կկայանա մարտի 18-ին Լոնդոնում։

Մյունխենի «Բավարիան» Իտալիայում հյուրընկալվելիս քարը քարի վրա չթողեց «Ատալանտային»՝ հաղթելով 6:1 հաշվով։

Արդեն 25-րդ րոպեի դրությամբ գերմանական մեքենան հաղթում էր 3:0 հաշվով. աչքի ընկան Յոսիպ Ստանիշիչը, Մայքլ Օլիսեն և Սերժ Գնաբրին։

Երկրորդ խաղակեսում Օլիսեն դուբլ ձևակերպեց, ևս երկու գոլ էլ իր հաշվին գրանցեց Նիկոլաս Ջեքսոնը։ Իտալական ակումբի հեղինակության գնդակը խաղավերջում խփեց Մարիո Պաշալիչը։

Պատասխան հանդիպումը կկայանա մարտի 18-ին Մյունխենի «Ալյանց Արենայում»։

Չեմպիոնների լիգայի 2025/26 թթ. խաղարկության 1/8 եզրափակչի առաջին խաղում «Բարսելոնան» հյուրընկալվելիս դրամատիկ պայքարում ոչ-ոքի խաղաց «Նյուքասլի» հետ (1-1):

​Հանդիպման հիմնական ժամանակի մեծ մասն անցավ համառ պայքարում և առանց դարպասի գրավումների: Խաղավերջում իրադարձությունները բուռն զարգացում ստացան. 86-րդ րոպեին Հարվի Բարնսը գրավեց հյուրերի դարպասը՝ առաջ մղելով տանտերերին։

Սակայն կատալոնացիները պայքարեցին մինչև վերջ և կարողացան բեկել խաղի ընթացքը. հանդիպմանը ավելացված ժամանակում՝ 90+6-րդ րոպեին, Լամին Յամալը անվրեպ իրացրեց նշանակված 11 մետրանոց հարվածը՝ փրկելով իր թիմին պարտությունից և ձևակերպելով վերջնական հաշիվը:

Թիմերի միջև պատասխան խաղը կկայանա մարտի 18-ին՝ Երևանի ժամանակով 21։45-ին, որտեղ էլ կվճռվի քառորդ եզրափակչի ուղեգրի ճակատագիրը։

Ավարտվեց Չեմպիոնների լիգայի 2025/26 մրցաշրջանի 1/8 եզրափակչի առաջին հանդիպումը, որում թուրքական «Գալաթասարայը» Ստամբուլի «ՌԱՄՍ Պարկ» մարզադաշտում ընդունել էր անգլիական «Լիվերպուլին»։ Իսպանացի մրցավար Խեսուս Խիլ Մանսանոյի գլխավորությամբ ընթացող խաղում դաշտի տերերը նվազագույն՝ 1:0 հաշվով հաղթանակ տարան։

Հանդիպման հաշիվը բացվեց արդեն 7-րդ րոպեին. անկյունայինի խաղարկումից հետո աչքի ընկավ «Գալաթասարայի» կիսապաշտպան Մարիո Լեմինան։

Երկրորդ խաղակեսում թիմերը ևս մեկական անգամ գրավեցին միմյանց դարպասները, սակայն երկու դեպքում էլ գոլերը չեղարկվեցին։ Նախ՝ 63-րդ րոպեին նիգերիացի հարձակվող Վիկտոր Օսիմհենի խփած գնդակը չհաշվվեց խաղից դուրս վիճակի պատճառով, ապա 71-րդ րոպեին VAR համակարգի միջամտությունից հետո չեղարկվեց նաև մերսիսայդցիների գոլը, որը նույնպես ծնվել էր անկյունայինի խաղարկումից հետո։

Թիմերի միջև պատասխան հանդիպումը կկայանա չորեքշաբթի՝ մարտի 18-ին, Լիվերպուլի «Էնֆիլդ» մարզադաշտում։ Այս դիմակայության հաղթողը մրցաշարի քառորդ եզրափակչում ուժերը կչափի ՊՍԺ — «Չելսի» զույգի հաղթողի հետ։

Հետևեք մեզ՝ այստեղ