ԵՄ-ն դադարեցնում է վիզայի ազատ ռեժիմը Վրաստանի դիվանագիտական անձնագիր ունեցողների համար

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Եվրոպական հանձնաժողովը դադարեցնում է Շենգենյան գոտի առանց վիզայի մուտքի իրավունքը Վրաստանի դիվանագիտական, ծառայողական և պաշտոնական անձնագրեր ունեցող անձանց համար։ Այսուհետ նրանք Շենգենյան գոտի մուտք գործելիս պարտավոր են ունենալ վիզա։ Սա առաջին դեպքն է, երբ կիրառվում է վիզայի ազատ ռեժիմի կասեցման նոր և ուժեղացված մեխանիզմ։

Վրաստանի դեմ այս մեխանիզմը գործարկվում է վիզայի ազատ ռեժիմի շրջանակում ստանձնած պարտավորությունների խախտումների պատճառով։

«Եթե իշխանությունը հարձակվում է իր իսկ ժողովրդի վրա, լռեցնում է լրագրողներին և սահմանափակում է ազատությունները, դա չի կարող անհետևանք մնալ։ Եվրամիությունը արդեն դադարեցրել է Վրաստանին տրամադրվող ֆինանսավորումը՝ ժողովրդավարության հետընթացի պատճառով։ Այսօր Եվրոպան նաև դադարեցնում է Եվրամիությունում ազատ տեղաշարժի հնարավորությունը նրանց համար, ովքեր կապված են վրացական ճնշող իշխանությունների հետ, այդ թվում՝ վրացի դիվանագետների»,- ասել է ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Կայա Կալասը։

Նրա խոսքով՝ Վրաստանի ժողովուրդն ունի ԵՄ լիարժեք աջակցությունը, սակայն «ԵՄ-ում տեղ չկա նրանց համար, ովքեր բռնաճնշումներ են իրականացնում»։

Անդամ երկրներից Հունգարիան և Սլովակիան այս որոշմանը դեմ են քվեարկել։ Հարցին, թե նրանք կխանգարեն այս որոշման կիրառմանը, մարտի 6-ի ասուլիսին Եվրահանձնաժողովի խոսնակ Մարկուս Լամերթը պատասխանեց, որ «որոշման հետևանքներից մեկն այն է, որ նման անձնագրեր ունեցող անձանց համար երկկողմանի վիզային արտոնություններն այլևս հնարավոր չեն»։

Հանձնաժողովից նշում են նաև, որ Վրաստանը հրաժարվել է համապատասխանեցնել իր վիզային քաղաքականությունը Եվրամիության քաղաքականությանը, և Վրաստանի իշխանությունների գործողությունները խաթարում են այն սկզբունքները, որոնց վրա հիմնված է վիզաների ազատականացումը։

Բացի այդ, երբ Վրաստանի դիվանագիտական, ծառայողական կամ պաշտոնական անձնագրեր ունեցող անձինք դիմում են Շենգենյան վիզայի համար, անդամ պետություններին առաջարկվում է իրականացնել մանրակրկիտ ստուգում՝ անցկացնելով հարցազրույցներ և պահանջելով լրացուցիչ փաստաթղթեր։ Եթե դիմորդի տրամադրած տեղեկատվության վստահելիության վերաբերյալ կասկածներ առաջանան, անդամ պետությունները պետք է մերժեն վիզայի տրամադրումը։

Կասեցումը կգործի մինչև 2027-ի մարտի 6-ը, իսկ եթե Վրաստանը «չլուծի կառավարման և օրենքի գերակայության հետ կապված խնդիրները, հանձնաժողովը կարող է երկարաձգել որոշումը»։ Հանձնաժողովը կարող է նաև որոշել այս միջոցը տարածել Վրաստանի բոլոր քաղաքացիների վրա։

Եվրահանձնաժողովի այս որոշումը կայացել է վիզայի կասեցման վերանայված մեխանիզմի շրջանակում, որը ուժի մեջ էր մտել 2025-ի վերջին։ Այն Եվրամիությանը տալիս է ավելի ուժեղ և արագ գործիքներ՝ արձագանքելու վիզայի ազատ ռեժմի չարաշահումներին և անվտանգության ռիսկերին։

Վրաստանում իշխող «Վրացական երազանք»-ը վերջին երկու տարիներին մեդիայի ազատությունը և մարդու իրավունքները սահմանափակող օրենքներ է ընդունում՝ օտարերկրյա գործակալների մասին, ցույցերի կազմակերպման սահմանափակումներ։ 2024-ին Եվրամիությունը սառեցրել է Վրաստանի՝ Միությանը անդամակցելու թեկնածությունը, որը տրվել էր 2023-ին։

Հետևեք մեզ՝ այստեղ