Ի՞նչ պատասխանատվության միջոց կկիրառվի, եթե վարորդը հրաժարվի սթափության վիճակը ստուգելու նպատակով զննություն անցնելուց

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Որպես կանոն, երբ ոստիկանությունը կանգնեցնում է վարորդին՝ կասկածելով նրան ոչ սթափ վիճակում լինելու մեջ, վարորդները հաճախ մտածում են, որ զննությունից խուսափելով կկարողանան խուսափել պատասխանատվությունից։ Սակայն իրականում այդ քայլը շատ ավելի ծանր հետևանքներ է առաջացնում։

Ինչպես տեղեկացնում է Iravaban.net–ը, Վարչական իրավախախտումների վերաբերյալ ՀՀ օրենսգրքի 126-րդ հոդվածի 4-րդ մասը հստակ սահմանում է սթափության ստուգումից խուսափելու համար նախատեսված պատասխանատվության միջոցները, որի համաձայն՝ սահմանված կարգին համապատասխան՝ սթափության վիճակը ստուգելու նպատակով զննություն անցնելուց խուսափելը առաջացնում է տրանսպորտային միջոցներ վարելու իրավունքից զրկում՝ երկու տարի ժամկետով։

Ուշադրություն. Զննությունից խուսափելը համարվում է ինքնին առանձին իրավախախտում և պատասխանատվության միջոցը կիրառվում է անկախ նրանից՝ արդյոք վարորդը իրականում ոչ սթափ վիճակում էր, թե ոչ։

Համեմատություն պատասխանատվության այլ միջոցների հետ

Համեմատության համար՝ եթե վարորդը անցնի զննություն և պարզվի, որ նա ոչ սթափ վիճակում է՝

• Միայն ալկոհոլի ազդեցության տակ լինելու դեպքում՝ տուգանքի նշանակում՝ սահմանված նվազագույն աշխատավարձի քսանիննապատիկի չափով՝ 29,000 դրամ, ինչպես նաև տուգանային միավորի կիրառում՝ 5 միավոր։
• Եթե արյան մեջ ալկոհոլի պարունակությունը գերազանցում է 1 գրամը կամ արտաշնչած օդի մեջ՝ 0.5 միլիգրամը, առաջացնում է վարելու իրավունքից զրկում՝ մեկ տարի ժամկետով։
• Եթե հայտնաբերվի թմրամիջոց կամ հոգեմետ նյութ՝ վարելու իրավունքից զրկում՝ երկու տարի ժամկետով։

Ինչպես տեսնում եք, զննությունից խուսափելը հավասարազոր է ամենածանր պատասխանատվության միջոցին՝ երկու տարի վարելու իրավունքից զրկմանը, անկախ նրանից՝ արդյոք վարորդը իրականում ոչ սթափ վիճակում էր, թե ոչ։

Կարևոր է իմանալ

Օրենսգրքով նախատեսված դեպքում անձը համարվում է ոչ սթափ վիճակում գտնվող, եթե ստուգմամբ պարզվում է, որ նրա մեկ լիտր արյան մեջ մաքուր ալկոհոլի պարունակությունը 0.2 գրամից կամ մեկ լիտր արտաշնչած օդի մեջ 0.1 միլիգրամից ավելի է, կամ եթե անձի արյան կամ մեզի մեջ առկա է թմրամիջոցի կամ հոգեմետ (հոգեներգործուն) նյութի պարունակություն։

Արտաշնչած օդի մեջ մաքուր ալկոհոլի պարունակության միջոցով վարորդի ոչ սթափ վիճակում լինելու փաստի որոշումը կարող է իրականացվել տեխնիկական միջոցով կամ բժշկական փորձաքննությամբ։ Անձի արյան մեջ մաքուր ալկոհոլի կամ արյան կամ մեզի մեջ թմրամիջոցի կամ հոգեմետ նյութի պարունակությամբ ոչ սթափ վիճակի որոշումն իրականացվում է բժշկական փորձաքննությամբ։

Հիշեք՝ սթափության ստուգումը վարորդի օրինական պարտականությունն է։ Զննությունից խուսափելը ոչ միայն չի օգնի խուսափել պատասխանատվությունից, այլ կարող է առաջացնել ավելի ծանր պատասխանատվության միջոց՝ երկու տարի վարելու իրավունքից զրկում։ Համագործակցեք ոստիկանության հետ և հարգեք օրենքը, – տեղեկացնում է Iravaban.net–ը։

Հավելյալ տեղեկությունների համար կարող եք այցելել Iravaban.net մասնագիտական առցանց մեդիա։

Հետևեք մեզ՝ այստեղ