«Ինքը զուտ նեղվում է, որ իրենից տաղանդավոր եմ». ինտրիգներ ու հումոր՝ «Ժիրո–Իվան»-ի 3-րդ եթերաշրջանում. նոր դեմքեր, նոր զարգացումներ

«Ժիրո–Իվան» սիթքոմի երրորդ եթերաշրջանը մեկնարկում է նոր սցենարով և նոր դերասանների մասնակցությամբ։  Ստեղծագործական թիմը խոստանում է նոր զարգացումներ, անակնկալներ և բոլորովին այլ մթնոլորտ։ Tert.am Life-ը ներկա է եղել նկարահանման հրապարակում ու զրուցել դերասանների հետ: Ներկայացնում ենք առաջին ֆոտոշարքը նոր կերպարների ներգրավվածությամբ:

Գլխավոր հերոսներից մեկին՝ Իվանին մարմնավորող Լեռնիկ Հարությունյանը նշում է, որ այս եթերաշրջանում փոխվել է հիմնական միջավայրը․ «Ռեստորանային պատմությունը այլևս չկա, տաղավարը ամբողջությամբ փոխվել է»: 

Նրա խոսքով՝ նոր դերասաններ են ներգրավվել և հույս ունի, որ ամեն ինչ հաջող կստացվի։ «Ինձ համար միշտ հետաքրքիր է եղել թիմի հետ աշխատանքը։ Ընտանիքի նման ենք, սիրով ենք գալիս նկարահանման։ Այս եթերաշրջանի սցենարային փոփոխությունները կարծում եմ՝ ավելի հետաքրքիր կդարձնեն ընթացքը»,- ասաց նա։

Կոնֆլիկտների մասին հարցին դերասանը պատասխանում է հումորով՝ նշելով, որ գրեթե ոչ մեկի հետ կոնֆլիկտ չի ունենում։ Իսկ Անդրանիկ Հարությունյանի հետ «կոնֆլիկտը», ըստ նրա, միայն կատակների տիրույթում է. «Ինքը զուտ նեղվում է, որ իրենից տաղանդավոր եմ»։

Նինա Տիտանյանի խոսքով՝ 3-րդ եթերաշրջանում շարունակվում է երկու եղբայրների պայքարը, բայց արդեն նոր պայմաններում։ «Այն գիծը, որ երկու եղբայր իրար սիրում են, միշտ կա, և դա մեզ բոլորիս ուրախացնում է։ Արձագանքները շատ են մոտիվացնում՝ մարդիկ հարցնում են՝ բա ե՞րբ է լինելու»։

Նա նաև նշում է, որ ստեղծագործական վեճեր լինում են, սակայն դրանք մնում են տաղավարի ներսում, իսկ նկարահանման հրապարակից դուրս թիմը պահպանում է ջերմ հարաբերությունները։

Մաշա Մաթևոսյանն, ով նոր է միացել թիմին, խոստովանում է, որ նախքան հրավիրվելը սիթքոմին ամբողջությամբ չէր հետևել։

«Երբ հրավիրեցին, իհարկե նայեցի, որ հասկանամ՝ ուր եմ գալիս։ Շատ լավ մթնոլորտ է, երեխաները շատ լավն են, իսկապես հաճելի է ու շատ զվարճալի»,- ասաց նա՝ մաղթելով սիթքոմին բարձր վարկանիշներ ու երկար կյանք։

Վաչե Երիցյանի խոսքով՝ նախորդ սեզոնների լարվածությունը փոքր-ինչ թուլացել է, քանի որ եղբայրները սկսել են ավելի համախմբվել։

 «Եթե առաջ իրար դեմ էին գործում, հիմա շատ դեպքերում միասին են անում, և դա նոր երանգ է տալիս պատմությանը։ Նոր կերպարները միայն հարստացնում են տեսարանները։ Մեր սիթքոմը ժամանցային է՝ նայեք, վայելեք, ծիծաղեք ու սիրեք իրար»,- մեզ հետ զրույցում նշեց Վաչե Երիցյանը:

Էմիլ Գալստյանը ևս նոր է միացել սիթքոմին, նա պատմեց, որ առաջարկը ստացել է դեռ երկրորդ եթերաշրջանում, սակայն երկրից դուրս գտնվելու պատճառով միացել է երրորդից։ Նրա կերպարը, ըստ դերասանի, արդիական ու երիտասարդական կերպար է՝ «քյարթու» երանգներով, բայց շատ փակագծեր չցանկացավ բացել

Անդրանիկ Հարությունյանը, հավատարիմ իր հումորային ոճին, ասում է, որ երրորդ եթերաշրջանում «վառ գույն» է ավելացել, և այդ գույնը, ըստ նրա, ինքն է։

«Շատ ուրախ եմ, որ կրկին նույն տաղավարում եմ Լեռնիկի, Վաչեի ու նոր միացած դերասանների հետ։ Իմ կերպարը «գործ տվող» տղա է, որը ամեն լավ բան նույնիսկ վատով է մեկնաբանում և հասցնում ոստիկանություն։ Կսիրվի,թե՝ ոչ, կտեսնենք, բայց ես մեծ հետաքրքրությամբ եմ խաղում»,- նշեց  նա։

Պրոդյուսեր Ռաֆայել Ղազանչյանը շեշտեց, որ երրորդ եթերաշրջանը կարելի է համարել մի տեսակ ռեստարտ։ «Անձնակազմի գրեթե կեսը նոր դեմքեր են, կտրուկ փոփոխություններ ենք արել։ Սեզոնը կլինի 16 մասանոց, անսպասելի զարգացումներով ու ավարտով»։

Նրա խոսքով՝ եղբայրների հետ կապված ավարտը կլինի այնպիսին, «որ ոչ ոք չի սպասում»։ Միաժամանակ նա բացահայտում է, որ հարսները հղի են, ինչը ենթադրում է պատմության հնարավոր շարունակություն, սակայն ընդգծում է՝ հետագա սեզոնների հարցը կախված է թե՛ հեռուստադիտողից, թե՛ հեռուստաընկերությունից։

Երրորդ եթերաշրջանը կհեռարձակվի մարտի 9-ից՝ «Արմենիա TV»-ի եթերում։