Կարևորում եմ այն հանգամանքը՝ իմպիչմենտի գործընթացի մասին ոչ միայն խոսում են ընդդիմադիրները, այլև ամբիոնից խոսում են իշխանությունները, ինչը ցույց է տալիս՝ թեման ներքաղաքական օրակարգի մաս է կազմում. Աբրահամյան (տեսանյութ)

Տարածաշրջանային ծանր զարգացումների համատեքստում բավականին ուշագրավ էր օրեր առաջ Ադրբեջանի նախագահի՝ Հայաստանի Հանրապետության ուղղությամբ «նետված քարերը»: Այս մասին ԱԺ-ում ասել է «Պատիվ ունեմ» խմբակցույան պատգամավոր Տիգրան Աբրահամյանը։

«Կեղծ և մտացածին մեղադրանքներ հնչեցնելով Հայաստանի հասցեին՝ ռազմական հանցագործություններ գործելու և օկուպացիայի իրականացնելու մեջ, Ալիևը հայտարարել է, որ հայերը միշտ պետք է վախենան, ինչպես դա հիմա է, որովհետև դա է ադրբեջանցիների խաղաղ ապրելու գրավականը: Պետությունը, որը բազում ռազմական հանցագործություններ է գործել հայ ժողովրդի նկատմամբ՝ Արցախում և Հայաստանում, ագրեսիա, էթնիկ զտումներ, ցեղասպանություն իրականացնել, այս պահին էլ օկուպացված պահում ՀՀ ինքնիշխան տարածքները, մեզ՝ հայերիս, մեղադրում է ինչ-որ բանում. նույնիսկ կարևոր էլ չէ, թե ինչում: Ադրբեջանի ղեկավարը մեկ անգամ չէ, որ հրապարակային հայտարարել է, որ միջազգային իրավունքն այլևս չի գործում և իրենք գործում են ուժի դիրքերից:

Այս սկզբունքը հատկապես վերջին տարիներին ընդգծված աշխատել է և հայ ժողովուրդն այն իր «մաշկի վրա» զգացել է՝ վիրավորանքների, հոխորտանքների, հարձակումների, մարդկային և տարածքային կորուստների ձևով: Մի բան է, թե ինչ նարատիվներ ու մոտեցումներ է առաջ քաշում Ադրբեջանը, ինչպես է հայերին թշնամի համարելու և ատելություն դրսևորելու ֆոնին խոսում խաղաղության մասին, մեկ այլ բան է, թե այս իրողություններն ինչպես են ընդունվում Հայաստանում: Հասարակության ճնշող մեծամասնությունը համարում է, որ Ադրբեջանից հնչող սպառնալիքները, դրսևորվող տարածքային հավակնությունները, ինչպես նաև՝ շանտաժով խոսելն ու օրակարգ թելադրելը չի բխում Հայաստանի շահերից, ավելին՝ այն իր մեջ մեծ սպառնալիքներ է պարունակում:

Վստահ եմ, որ իշխանությունն էլ գիտակցում է, թե ինչ է Ադրբեջանի ուզածը և իր անհամաչափ զիջումները ինչ մեծ գին են ունենալու Հայաստանի համար: Այլ բան է, որ հայաստանյան ռեժիմը, ստորադասելով արտաքին վտանգներն ու սպառնալիքները, իրականությունը ներկայացնում է լրիվ այլ տրամաբանությամբ ու գույներով, որտեղ առաջնահերթը ոչ թե հայի հավաքական շահն է, այլ ՔՊ նեղկուսակցական ախորժակը, ոչ թե Հայաստանը, այլ մեր գլխին մուրճ ճոճողները, ոչ թե խաղաղությունը, այլ լիակատար կապիտուլյացիան:

Կարևորում եմ այն հանգամանքը, որ իմպիչմենտի գործընթացի մասին ոչ միայն խոսում են ընդդիմադիրները, այլև ամբիոնից խոսում են իշխանությունները, ինչն ինքնին ցույց է տալիս, որ թեման ներքաղաքական օրակարգի մաս է կազմում»,-ասել է նա: