Հանգստի համար Դուբայ մեկնած ՀՀ քաղաքացիները անորոշության մեջ են

Դուբայ հանգստի  մեկնած ՀՀ մի խումբ քաղաքացիներ հայտնվել են անորոշ իրավիճակում։ Նրանցից մեկը՝ Մարինե Պողոսյանը, պատմում է, որ Դուբայ հասել են շաբաթ օրը,  տեղավորվել հյուրանոցում, երբ հանկարծ հյուրանոցի հարակից տարածքում պայթյուն է որոտացել։

«Հանգիստը մեզ համար վերածվել է լարված սպասումների», – ասում է Մարինեն։ Նրա խոսքով՝ եղբայրը ցանկացել էր անակնկալ անել և ուղևորությունը կազմակերպել որպես նվեր, որպեսզի մի փոքր հանգստանան։ «Խեղճ եղբայրս, իբր, նվեր էր արել մեզ, բայց ես հիմա դասական օրինակ եմ, թե ինչպես կարելի է սխալ պահին, սխալ տեղում հայտնվել», – նշում է նա։

Մարինեն պատմել է, որ առաջին օրը ուշադիր հետևել է հյուրանոցում գտնվող մյուս մարդկանց արձագանքին։ «Այնքան հանգիստ էին, կարծես ոչինչ չէր կատարվում», – զարմացած ասել է նա՝ ավելացնելով.  բազմաթիվ ազգեր իրենց մաշկի վրա չեն զգացել պատերազմի դառնությունը։

Նախատեսված էր, որ Մարինեն Երեւան պետք է վերադառնար մարտի 3-ի չվերթով, սակայն ոչ միայն հանգիստն է տապալվել, այլ անգամ չգիտեն, թե ինչպես են վերադառնալու։ «Չենք հասցրել վայելել որևէ հանգիստ, ավելին՝ անորոշության մեջ ենք», – ասել է Մարինեն։ 

Նրա խոսքով՝ առաջին օրը իրենց տարհանել են հյուրանոցից, իսկ թե ինչ կլինի հետո՝ չգիտեն։

Արդեն հայտնել ենք, որ ԱՄԷ ում գործող ՀՀ դեսպանատունը հայտարարել էր, որ ՀՀ կառավարությունը աշխատանքներ է իրականացնում, հնարավորության պարագայում, օդային ճանապարհով Հայաստան փոխադրում իրականացնելու ուղղությամբ։

Այն քաղաքացիները, որոնք ցանկություն կունենան կամավոր հիմունքներով Օմանի տարածքով մեկնել Հայաստան, կարող են լրացնել ստորև դեսպանատան ներկայացրած հայտը։

ԱՄԷ-ում ՀՀ դեսպանությունն, ըստ հնարավորության, կաջակցի նաև թռիչքի համար ԱՄԷ-ից Մասկատ տեղափոխման հարցում։ Թռիչքի կազմակերպման պարագայում առաջնահերթությունը կտրվի կանանց, երեխաներին և տարեց անձանց։