Ռուսական մարտական ինքնաթիռները մոտեցել են Ալյասկային

Ամերիկացի զինվորականները փետրվարի 19-ին Ալյասկայի ափերի մոտ իրականացրել են ռուսական ռազմական ինքնաթիռների որսման գործողություն: Ռուսական հինգ օդանավ՝ երկու Tu-95 հեռահար ռազմավարական ռմբակոծիչ, երկու Su-35 կործանիչ և А-50 հեռահար ռադիոլոկացիոն հայտնաբերման մեկ ինքնաթիռ, հայտնվել է ԱՄՆ հակաօդային պաշտպանության նույնականացման գոտում (ADIZ): Այս մասին հայտնել է Հյուսիսային Ամերիկայի օդատիեզերական պաշտպանության հրամանատարությունը (NORAD)։

Աերիկյան հրամանատարությունը հայտնել է, որ ռուսական ինքնաթիռները չեն մտել ո՛չ ԱՄՆ-ի, ո՛չ էլ Կանադայի օդային տարածք։ Դրանք գտնվել են միայն ADIZ-ի շրջանում, որն ազգային օդային տարածքից դուրս է և ծառայում է որպես անվտանգության բուֆերային գոտի։

Ռուսական ինքնաթիռներին ի պատասխան՝ NORAD-ը զգալի ուժեր է օդ բարձրացրել։ Գերատեսչությունը հայտնել է, որ գործողությանը մասնակցել է երկու F-16 կործանիչ, երկու F-35 կործանիչ, չորս KC-135 տանկեր և մեկ E-3 AWACS հեռահար ռադիոլոկացիոն հայտնաբերման ինքնաթիռ։

Հրամանատարությունն ընդգծել է, որ նման միջադեպերը տեղի են ունենում պարբերաբար և չեն համարվում սպառնալիք։ Ռազմական փորձագետների կարծիքով՝ նման թռիչքները պետությունները հաճախ օգտագործում են ՀՕՊ համակարգերի պատրաստվածությունը և հավանական հակառակորդի արձագանքման արագությունը ստուգելու համար։