Գլխավոր դատախազը հանձնարարել է խստացնել քրեական քաղաքականությունը. ամփոփվել են Արմավիրի մարզի դատախազության 2025 թվականի աշխատանքները

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հայաստանի Հանրապետության գլխավոր դատախազ Աննա Վարդապետյանի գլխավորությամբ 2026 թվականի փետրվարի 11-ին ամփոփվել են Արմավիրի մարզի դատախազության 2025 թվականի աշխատանքները:

Ամփոփմանը ներկա են եղել ՀՀ գլխավոր դատախազի տեղակալ Եղիազար Ավագյանը, Արմավիրի մարզի դատախազ Սևակ Պողոսյանը, Արմավիրի մարզպետ Վահրամ Խաչատրյանը, Դատախազության գլխավոր քարտուղար Մհեր Ափրիկյանը, Ներքին գործերի նախարարության, Ազգային անվտանգության ծառայության, Քննչական կոմիտեի մարզային կառույցների ղեկավարները, մարզի դատախազության դատախազները, այլք:

Սևակ Պողոսյանը, ներկայացնելով Արմավիրի մարզի դատախազության 2025 թվականի աշխատանքների զեկուցագիրը, նշել է, որ 2025 թվականին Արմավիրի մարզում նախաձեռնվել է 3669 քրեական վարույթ (2024 թվականին՝ 3671 քրեական վարույթ):

Հաշվետու ժամանակահատվածում դատախազների կողմից հաստատված մեղադրական եզրակացությամբ դատարան է հանձնվել 1,310 քրեական վարույթ՝ 1,345 անձի վերաբերյալ (2024 թվականին՝ 1,307 քրեական վարույթ՝ 1,374 անձի վերաբերյալ): Նշված վարույթներից 92-ը ծանր և առանձնապես ծանր հանցագործությունների վերաբերյալ են:

Այս համատեքստում Արմավիրի մարզի դատախազն ընդգծել է, որ 2025 թվականին մարզում գրանցված սպանության բոլոր 7 դեպքերը բացահայտված են, դրանցից 5-ն ուղարկված են դատարան:

2025 թվականին դատարաններում ավարտվել է 1,050 քրեական գործ՝ 1,085 անձի վերաբերյալ (2024 թվականին՝ 986 քրեական գործ՝ 1,050 անձի վերաբերյալ):

Արմավիրի մարզի դատախազի տեղեկացմամբ, 2025 թվականին քրեական վարույթներով պետությանը պատճառված վնասից վերականգնվել է 171 միլիոն 293 հազար դրամ:

Պետական (համայնքային) շահերի պաշտպանության ոլորտում կատարված  աշխատանքների արդյունքում 2025 թվականին վերադարձվել է 6 միլիոն 750 հազար դրամ, դատարան է ներկայացվել 8 քաղաքացիական հայց. բոլոր հայցերը դատարաններում քննության փուլում են: Հայցերից բացի, պետական (համայնքային) շահերի պաշտպանության ոլորտում մարզի դատախազության կողմից իրականացվում է 12 ուսումնասիրություն:

Գլխավոր դատախազ Աննա Վարդապետյանը, ի թիվս այլնի, մի շարք հանձնարարականներ է տվել մարզի դատախազին և դատախազության դատախազներին՝ ուղղված մարզում քրեական քաղաքականությունը խստացնելուն, հանցավորության կանխարգելմանն ու բացահայտմանը, ինչպես նաև պետական և համայնքային շահերի պաշտպանության ուղղությամբ աշխատանքներն ակտիվացնելուն:

Հետևեք մեզ՝ այստեղ