Հեղուկ գազի գինը կիջնի՞

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հեղուկ գազի շուկայում իրավիճակը շարունակում է մտահոգիչ մնալ։ Թեև պատկան մարմինները հայտարարում են, թե գները կարգավորվել են, միևնույն է, վարորդները շարունակում են ահազանգել՝ գազը թանկ է։ Նրանց փոխանցմամբ՝ տարբեր լցակայաններում հեղուկ գազի գինը ներկայումս տատանվում է 210-240 դրամի սահմաններում։

Քաղաքացիների խոսքով՝  գնի փոփոխությունները բացասաբար են ազդում իրենց կյանքի որակի վրա։ Վերջիններս նշում են, որ հեղուկ գազի գինը շարունակում է լրացուցիչ ֆինանսական բեռ ստեղծել իրենց համար։ 

Մեզ ահազանգած վարորդները նկատում են՝ գինը բարձր է, իսկ որակը՝ շատ ցածր։ 

MediaHub-ը թեմայի վերաբերյալ զրուցել է տնտեսագետ Սուրեն Պարսյանի հետ, ով նկատեց՝ հիմա պիկը անցել է, գինը շուտով էլ ավելի կիջնի, քանի որ Վերին Լարսի անցակետում իրավիճակը ավելի լավ է. մատակարարման, սպասարկման խնդիրներ չեն առաջանում։ 

«Նաև Իրանից է սկսել հեղուկ գազի որոշակի քանակություն Հայաստան գալ, որը գնի վրա իր ազդեցությունը ևս կունենա։ Բացի այդ, Կառավարության և գերատեսչությունների հայտարարությունները, կարծում եմ, ազդեցություն թողեցին որոշ տնտեսվարողների գերշահույթ ստանալու մոլուցքի վրա, և դա պարտադրեց որոշակիորեն զսպել իրենց ախորժակը»,- ասաց տնտեսագետը։

Անդրադառնալով Կառավարության այն հայտարարությանը, թե արդեն երկաթուղով կարող ենք հեղուկ գազ բերել՝ Պարսյանը նշեց, որ դա ավելի շատ քաղաքական հայտարարություն է, քան տնտեսական, քանի որ այս պահին որևէ տնտեսվարող այդ ճանապարհով հեղուկ գազ բերելու մտադրության մասին չի հայտնել։

«Հետագայում այսպիսի գործընթացները կարող է ստիպեն, որ մեքենաներով ավելի քիչ քանակով հեղուկ գազ ներկրվի Հայաստան, բայց այդտեղ էլ այլ խնդիր կարող է առաջանալ՝ կապված թղթաբանության և բյուրոկրատիայի հետ։ Այնուամենայնիվ, այդ գործընթացը կարող է ազդեցություն ունենալ հեղուկ գազի շուկայի գնային քաղաքականության վրա»,- ամփոփեց խոսքը տնտեսագետը։

Էմմա Մարտիրոսյան

Հետևեք մեզ՝ այստեղ