Կնոջը խեղդամահ անելու մեջ մեղադրվող Նարեկ Սարգսյանը մեղավոր է ճանաչվել

Կնոջը խեղդամահ անելու մեջ մեղադրվող Նարեկ Սարգսյանը մեղավոր է ճանաչվել։ Երևանի ընդհանուր իրավասության քրեական դատարանը՝ դատավոր Սամվել Յուզբաշյանի նախագահությամբ, երեկ հրապարակել է 35-ամյա Տաթևիկ Աբրահամյանի՝ առանձին դաժանությամբ սպանության գործով վերդիկտը՝ մեղավոր ճանաչելով Սարգսյանին։ Դատարանի որոշման հետ պաշտպանության կողմը համաձայն չէ։ 

«Հայաստանում կա երկու տեսակի դատավոր՝ արդարամիտ, ով կարող է առանց անմեղությունը հիմնավորող ապացույց ներկայացնելու, ընդամենը շարժառիթի  բացակայությամբ կայացնի  արդարացման դատական ակտ և կա դատավոր, որ շարժառիթի, ուղիղ ապացույցի բացակայությամբ կայացնի մեղադրական վերդիկտ»,- «Փաստինֆո»-ի հետ զրույցում ասաց պաշտպան Աննա Ծառուկյանը՝ հավելելով, որ դատարանից այլ բան չէր սպասում, ի սկզբանե դատարանը տրամադրվածություն ուներ, հակվածություն ուներ մեղադրական կողմի նկատմամբ, ինչն ամեն անգամ ընդգծվում է՝ նրա վերաբերմունքով, անգամ ԲԴԽ նամակներ են ուղարկվել․ «Ես բացարկել եմ՝ հիմքում դնելով, որ դատախազի կոշիկից դատավորի կոշիկ չի անցել, ընդամենը երեք սպանության գործ ուներ, այդ թվում՝ այս գործը, որոնցից մեկով մեղադրական ակտ էր կայացվել, ինչն ինձ համար ինդիկատոր էր։ Եթե մարդը գալիս և ասում էր, որ ինքն է սպանել, բայց ոչինչ չի իրականացվում, ուղիղ որևէ ապացույց չկար, մյուս ապացույցները վիճարկել ենք, որևէ հիմք չենք թողնել, դատարանը որոշում է, որ պետք է մեղադրական վերդիկտ կայացվի, սա ինձ համար անարդարության բաստիոն է»։ 

Ողբերգական դեպքը, ինչպես հայտնել ենք, տեղի է ունեցել 2022թ. մայիսի 5-ին՝ Երևանում։ Բնակարանում հայտնաբերվել էր 35-ամյա Տաթևիկ Աբրահամյանի դին՝ պարանոցի և դեմքի շրջանում բռնության հետքերով։ Վերջինս ոստիկանության Կոտայքի մարզային վարչության նախկին պետ, ոստիկանության գնդապետ Ավետիք Աբրահամյանի դուստրն է, աշխատում էր ԵՊՀ-ում՝ որպես դասախոս։ Քրեական վարույթի շրջանակներում ձերբակալվել, ապա՝ կալանավորվել է Տաթևիկի ամուսինը՝ Նարեկ Սարգսյանը։ Վերջինս մեղադրվում է ՀՀ քրեական գործող օրենսգրքի 155-րդ հոդվածի 2-րդ մասի 6-րդ կետով՝ առանձին դաժանությամբ սպանության հատկանիշներով։ Ըստ վարույթն իրականացնող մարմնի, կնոջը խեղդամահ է արել երեք տարեկան երեխայի աչքի առաջ։ 

Պաշտպանության կողմը շարունակում է պնդել, որ Նարեկ Սարգսյանը դեպքի հետ որևէ առնչություն չունի, նշում են, որ դեպքի ժամանակ Սարգսյանը դեպքի վայրում չի եղել, ավելին, պաշտպանության կողմը պնդում է, որ դեպքի օրը բնակարան այլ տղամարդ է մուտք գործել։ Տուժող կողմը, սակայն, նշում էր, որ Տաթևիկ Աբրահամյանը և Նարեկ Սարգսյանն արդեն ավելի քան մեկ տարի է, ինչ փաստացի ամուսնալուծված են եղել, իսկ դեպքի օրը Տաթևը պետք է վերջնական դիրքորոշում հայտներ՝ ամուսնալուծության մասին, Տաթևը պատրաստվում էր հայց ներկայացնել դատարան։

 Բացի այդ, տուժողի ներկայացուցիչը հայտնել էր, որ Տաթևի նկատմամբ բռնության և սպառնալիքների դեպքեր նախկինում ևս եղել են, որոնց վերաբերյալ առանձին քրեական գործ է քննվում դատարանում։ Դեպքից երեք տարի անց՝ արդեն դատաքննության փուլում, առեղծվածային իրավիճակ է ստեղծվել. 2025թ. ապրիլի 8-ին դատական նիստերի դահլիճում գտնվող քաղաքացիներից մեկը, որը, ինչպես հետագայում պարզվեց, մեղադրյալ Նարեկ Սարգսյանի զարմիկն է և այս ողջ ընթացքում մշտապես ներկա է եղել  նիստերին, հետևել ապացույցների հետազոտման ընթացքին, այդ թվում` փորձագետների հարցաքննություններին, այլ խոսքով` քաջ ծանոթ էր դիակի վրա առկա վնասվածքների վերաբերյալ փորձագետների գնահատականներին, հայտարարությամբ է հանդես եկել դատարանում` նշելով, թե ինքն է իրականում սպանել Տաթևիկ Աբրահամյանին, այնուհետև` փախուստի էր դիմել դատարանից:  Նշված անձին  պաշտպանների նախաձեռնությամբ հարցաքննել են դատարանում, սակայն թե ինչու է որոշել երեք տարի լռելուց հետո նման հայտարարություն անել և սպանությունն իր վրա վերցրել` հոդաբաշխ պարզաբանում այդպես էլ չի ներկայացվել: