Ձյան տեղումներից հետո մեծաթիվ ու խոր փոսեր կան Երևանի ճանապարհներին. ահազանգ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Արխիվային լուսանկար

MediaHub-ը քաղաքացիներից բազմաթիվ ահազանգեր է ստացել այն մասին, որ վերջին օրերի առատ տեղումներից հետո Երևանի ճանապարհները զգալիորեն վնասվել են։ Քաղաքի տարբեր հատվածներում, ինչպես բակային տարածքներում, այնպես էլ կենտրոնական փողոցներում, առկա են մեծաթիվ ու խոր փոսեր, որոնք լուրջ վտանգ են ներկայացնում վարորդների համար։

Քաղաքացիների խոսքով՝ որոշ փոսեր այնքան մեծ են, որ անզգուշաբար դրանցով անցնելու դեպքում հնարավոր է մեքենայի լուրջ վնասում, իսկ որոշ դեպքերում անգամ՝ ամբողջական ջարդում։

Թեև որոշ հատվածներում փորձ է արվում ժամանակավոր փակել առաջացած փոսերը, սակայն շատ ճանապարհներ շարունակում են մնալ փոսերով լի։ Ավելին, փոսեր առկա են նույնիսկ այն հատվածներում, որտեղ քաղաքացիները հանձնում են վարորդական քննություններ՝ Էրեբունի վարչական շրջանում, ինչը լրացուցիչ ռիսկ է ստեղծում հատկապես սկսնակ վարորդների համար։

Արդյո՞ք իրականացվում են համապատասխան աշխատանքներ՝ ճանապարհների փոսերն ամբողջությամբ վերացնելու ուղղությամբ։

MediaHub-ը զրուցեց Երևանի քաղաքապետարանի Շինարարության և բարեկարգման վարչության պետի տեղակալի հետ, ով նշեց, որ եղանակային պայմաններով հիմնական աշխատանքները հնարավոր չի իրականացնել:

^{«Մենք,մի քանի օր է, գիշերային ժամերին կանխարգելիչ աշխատանքներ արել ենք, երեկ ևս գիշերային աշխատանքներ կատարել ենք, որ այն հիմնական մեծ խնդրահարույց վնասված հատվածները փակենք, մինչև եղանակային պայմանները թույլ տան, որ անցնենք հիմնական աշխատանքներին։  Որոշակի եղանակային պայմանների պատճառով պարտադրված ենք սպասել, մինչև լինի + ջերմաստիճան, +5-ից գոնե  բարձր լինի և ուղղակի չոր լինի ճանապարհը, որպեսզի աշխատանքի արդյունքը տեսնենք»։}

MediaHub-ի հարցին, թե ինչի՞ց է ընդհանրապես վնասվում ճանապարհները, ինչո՞ւ ձյան տեղումներից հետո փոսերը բացվում են, Շինարարության և բարեկարգման վարչությունից նշեցին.

«Մի քանի ֆակտորով է պայմանավորված, հիմնականում ինչ-որ չափի վնասվածք ունենում է ասֆալտբետոնե շերտը, եղանակային պայմաններով ձյունը, ջուրը լինում է, որ ավելի քայքայում են, այսինքն՝ ձյունը ինչ-որ քանակի հալվում է, ճաքերի մեջ է ներծծվում, հետո սառում է, ու այն դառնում է բնական պրոցես: Ասֆալտի շերտի մեծ մասի մաշվածությունն էլ կապ ունի, մեքենաների բեռնվածության հետ կապված բազմաթիվ ֆակտորներով պայմանավորված, և դրանից հետո ձյուն է գալիս, միկրո ճաքեր են լինում, ճաքերը արդեն վերածվում են փոսերի, որոնք հետագայում մեծանում են»։

Հետևեք մեզ՝ այստեղ