Հայրը բողոքում է, որ իրեն չեն վերադարձնում գետնափորում հայտնաբերված որդու մարմինը

News.am-ը գրում է .

Աշտարակի բնակիչ Հակոբ Հարությունյանը բողոքում է, որ մինչեւ այժմ իրեն չեն վերադարձրել 3 ամսական որդու մարմինը, որ իրենց գետնափոր տան բանկում ոստիկանները գտել էին 2015 թվականի հոկտեմբերին:

«Երբ հանեցին, սեղմեցին ցելոֆանի մեջ անշնորհք ձեւով: Մարդու հետ տենց չեն վարվում: Քննիչին մի քանի անգամ արդեն ասել եմ, որ տա, չի տալիս, ասում ա՝ իմ մոտ ա, ու շկաֆն ա ցույց տալիս»,- NEWS.am-ին ասաց Հակոբ Հարությանը:

Հիշեցնենք, որ երեխայի մահվան գործով մեղադրանք է առաջադրվել Հակոբ Հարությունյանի երկրորդ կնոջը՝ Արմինե Խաչատրյանին: Գործը դատաքննության փուլում է, առաջին դատական նիստը հետաձգվել է: Հայրը պնդում է, որ երեխայի իր կինը չի սպանել, պահանջում է արդարացում: 

Արմինե Խաչատրյանին մեղադրանք է առաջադրվել այն բանի համար, որ նա անմեղսունակության վիճակում 2008թ. մարտ ամսին, դեռեւս չպարզված օրը, իր ամուսին Հ. Հարությունյանի եւ Ա. Կարապետյանի մանկահասակ դստերը` 08.12.2007թ.-ին ծնված Մ. Հարությունյանին ապօրինաբար, դիտավորությամբ կյանքից զրկելու նպատակով քարով հարվածել է Մ. Հարությունյանի գլխին և սպանել նրան:

Ավելի վաղ NEWS.am-ը հայտնել էր, որ հոկտեմբերի 14-ին ոստիկանությունը Աշտարակի «Վանա լիճ» կոչվող թաղամասում՝ գետնափոր կիսակառույց շինության տնամերձ հողատարածքում, 3 ամսական երեխայի դի է հայտնաբերել: Պարզվել է, որ երեխային թաղել են ընտանիքի անդամները, 7 տարի առաջ:

Երեխայի դիակի դատաբժշկական փորձաքննությամբ պարզվել է, որ նա մահացել է գլխին հասցված բութ վնասվածքներից:

Երեխայի հայրը պնդում է, որ երեխային իր կինը չի սպանել, այլ հուղարկավորելու ժամանակ նա մոր ձեռքից պատահաբար ընկել է եւ գլխի շրջանում վնասվածք ստացել:

Հակոբյանների ընտանիքում ապրում են մահացած երեխայի մայրը՝ Անժելան, նրա երկու երեխաները, Հակոբի Հարությունյանի երկրորդ կինը՝ Արմինեն ու նրա երկու երեխաները: Ընտանիքի հարեւանուհին NEWS.am-ին պատմել էր, որ ընտանիքի հայրը՝ Հակոբը, սկզբում ամուսնացած է եղել Անժելայի հետ, տարիներ հետո տուն է բերել Արմինեին: Նա առաջին կնոջից ունի 2, երկրորդից՝ 3 զավակ, որոնցից մեկը գիշերօթիկում է սովորում: Անժելան հարեւանուհուն ասել է, որ ինքը շարունակել է ապրել Հակոբի հետ որպես գործընկերուհի, երբ Հակոբն ամուսնացել է Արմինեի հետ: Ընտանիքն ապրում էր գետնափոր կիսակառույց տանը՝ սոցիալապես վատ պայմաններում, ընտանիքի բոլոր անդամները քնում էին միասին՝ գետնափոր տանը տեղավորվող միակ երկտեղանոց մահճակալին: