«Իտալիայիս տունը չեք տեսել` իսկական բո՛մբ ա, բո՛մբ». Սամվել Ալեքսանյանը գլուխ է գովել

Օրերս հավաքույթներից մեկի ժամանակ քաղաքական էլիտայի «կարկառուն» ներկայացուցիչներից մեկը` Սամվել Ալեքսանյանը, խոսելով Հայաստանում եւ արտասահմանում գրանցած իր բիզնես ծրագրերի եւ հաջողությունների մասին՝ բարձր ոգեւորությամբ հայտարարել է, թե այժմ նա էլ ավելի  ընդլայնված կերպով է զբաղվում  անշարժ գույք, իսկ ավելի կոնկրետ՝ հյուրանոցներ, հանգստյան տներ ձեռք բերելով:

Հետաքրքրասեր գործընկերների հարցին, թե ինչիդ են պետք այդքան` մեկը մյուսից շքեղ կալվածքները, պատգամավոր-խոշոր բիզնեսմենը պատասխանել է. «Իմոնք պտի ամենալավը ըլնեն, իտալական ռեմոնտ եմ անելու, դու հլը սպասի… Բա դուք Իտալիայիս տունը չեք տեսել՝ իսկական բո՛մբ ա, բոմբ, էտ դիզայներներին բերելու եմ Հայաստան, որ սաղ իմ ուզածով սարքեն»:

Այն, որ Ալեքսանյանին իտալացի դիզայներները որպես բազմազավակ հոր խոշոր զեղչեր կանեն Հայաստան գալու եւ դիզայներական աշխատանքներ իրականացնելու համար՝ չենք կասկածում: Սակայն խիստ վհատվում ենք այն բանի համար, որ դրանից հետո «Սիթիի պադվալներում» փակվող տեղական անհամ ապրանքների գները եւս կլինեն եվրոպական:

Նկատենք, որ վերջին շրջանում մեկը մյուսի հետեւից բացահայտվում են «Սամվել ամենակարողի» կեղծած ու բրենդային անվանումների տակ վաճառվող էժանագին ապրանքները, սակայն, ինչպես ասում են, դա այլ օպերայից է, որին մոտ օրերս, անշուշտ, կանդրադառնանք:

Իսկ հիմա անդրադառնալով ալեքսանյանական նուրբ եւ բարձաճաշակ ոճին՝ պարզապես մի երկու տեղական խորհուրդ` լավ կլինի, որ սկզբից «իտալական ռեմոնտի» ենթարկեք Ձեր հագուկապը, փոխեք նաեւ դեմքի արտահայտությունը, եղեք ավելի լուրջ, բայց բարեհամբյուր, եւ առհասարակ  «սպանեք» այն «Իտալիան», որ տարիներ շարունակ Ձեր մեջ է, եւ դրանից հետո միայն զբաղվեք հայ աղքատ եւ կիսասոված հանրությանը զարմացնելով...

Թե չէ Իտա~լիա, Իտա~լիա…

Սոսե Չանդոյան