Էրդողանի վերելքի վերջը. թուրք հոդվածագրի անդրադարձը Թուրքիայում կայացած ընտրություններին

Թուրքիայի իշխող «Արդարություն և զարգացում» կուսակցության պնդումը՝ ընտրության նվազագույն շեմը 10 տոկոս դարձնելու վերաբերյալ, վնաս տվեց հենց իրեն, գրում է Radikal-ի հոդվածագիր Մուրադ Եթքինը։

Հեղինակը նշում է, որ այդ ամենը կարելի է նաև վերնագրել՝ «հունիսյան դասեր»։ 

Թուրքիայում նախօրեին կայացած խորհրդարանական ընտրությունների վերաբերյալ հոդվածը ներկայացնում ենք մասնակի կրճատումներով.

«2011 թվականին մոտ 50 տոկոսով հաղթանակ ձեռք բերած ԱԶԿ-ն երեկ (Թուրքիայում կայացած խորհրդարանական ընտրությունների արդյունքում-Tert.am) ստացավ ձայների 40 տոկոսը։

Նա դեռ առաջատար կուսակցությունն է, սակայն կառավարության վստահության քվեն ստանալու համար անհրաժեշտ 276 մանդատից ձեռք բերեց 258-ը։

Իշխանության մնալու համար, ըստ տարբերակներից մեկի, ԱԶԿ-ն ստիպված կլինի մեկ այլ կուսակցության հետ կոալիցիա կազմել։

Ամեն դեպքում, ինչպես երեկ հայտարարեց քրդամետ «Ազգերի ժողովրդավարություն» կուսակցության (HDP) համանախագահ Սելահեթթին Դեմիրթաշը, Ռեջեփ Թայիփ Էրդողանի՝ հզոր նախագահական նպատակներն արդեն ջուրն են ընկել։

Էրդողանը, հավանաբար, դրա համար ԱԶԿ-ի ղեկավարությունից ու վարչապետ Դավութօղլուից պատասխան է պահանջելու։

HDP-ի հաջողությունը վերջին շրջանում Թուրքիայում ընտրողների ցուցաբերած լուրջ դիմադրության արդյունքն էր։

Այլ պայմաններում հանգիստ Ժողովրդահանրապետական կուսակցության օգտին քվեարկող ընտրազանգվածի 2-3 տոկոսը մեծ քաղաքներում իրենց քվեն քրդամետ կուսակցությանն է տվել։
Դրա պատճառը նախ այն է, որ Դեմիրթաշը խոստացել է Էրդողանին նախագահի պաշտոնում չթողնել։

Ի դեպ, HDP-ն խորհրդարանում կլինի ոչ թե հազիվ շեմը հաղթահարելով, այլ հանգիստ իր բաժինն ունենալով ու մոտ 80 պատգամավորով։

Երեք ընդդիմադիր կուսակցությունների հետ կոալիցիա կազմելու հնարավորությունը փոքր է։ Դա 3 կուսակցություններն էլ մերժում են։

ԱԶԿ-ն իշխանության կարող է մնալ միայն փոքրամասնության կամ կոալիցիայի աջակցությամբ։

Իսկ Էրդողանի ծրագրերը տապալվեցին ընդամենը 10 րոպեում, երբ քվեաթերթիկների հաշվարկի ընթացքում սկսեցին նվազել ԱԶԿ-ի քվեներն ու HDP-ն հատեց 10 տոկոսի արգելքը»։