Հույները գոհ են Հայաստանում ազգային փոքրամասնությունների նկատմամբ վերաբերմունքից

Հայաստանում ազգային փոքրամասնությունների համար անհրաժեշտ պայմաններ են ստեղծված մշակույթի, ազգային ավանդույթների, լեզվի պահպանման համար:

«Արմենպրես»-ի մամուլի սրահում հրավիրված ասուլիսում «Իլիոս» հունականհասարակական կազմակերպությաննախագահ Սլավա Ռաֆայելիդիսը նշեց, որ Հայաստանում հունական համայնքը լուրջ խնդիրներ չունի:

«Հայաստանում ազգային փոքրամասնություններին դրական են վերաբերում: Մեզ տարածք է հատկացված, որպեսզի հանդիպումներ, քննարկումներ կամ տարբեր միջոցառումներ կազմակերպենք: Հունարենով ունենք ռադիո ժամ, հունարենով պարբերական է լույս տեսնում: Ունենք նաև պարային խումբ, ասյինքն` այն, ինչ անհրաժեշտ է մշակույթի, ազգային ավանդույթների պահպանման համար»,-ասաց Սլավա Ռաֆայելիդիսը:

Հայաստանում այսօր խառը ամուսնություններով բնակվում է շուրջ 2 հազար հույն, իսկ առանց խառը ամուսնությունների` շուրջ 1000 հույն: Հույները բնակվում են Ալավերդիում, Ստեփանավանում, Վանաձորում, Գյումրիում, Երևանում: Նախկինում Հայաստանում հույների թիվը կազմել է 12 հազար:

«Հայաստանում հույների թիվը պակասում է, խնդիրը հիմնականում սոցիալական է: Շատերը հեռացել են Հայաստանից, փորձել են հաստատվել տարբեր երկրներում: Հույները մեծ սիրով կմնային Հայաստանում, եթե սոցիալական դժվարությունները չլինեին: Ընդգծեմ, որ այդ սոցիալական խնդիրները բնորոշ են Հայաստանի ամբողջ բնակչությանը, դժվարություններն ընդհանուր երկրում են, և դրանք առկա չեն այս կամ այն ազգային փոքրամասնության շրջանում»,-ասաց Սլավա Ռաֆայելիդիսը:

Սլավա Ռաֆայելիդիսի խոսքով՝ հույները Հայաստանում բնակվում են 350 տարուց ավելի, հիմնականում եկել են որպես հանքագործներ՝ Ալավերդու հանքերը շահագործելու համար: Տեղի բնակչությանը հանքարդյունաբերություն են սովորեցրել:

«Մենք ունենք մեր ազգային տոնը՝ մարտի 25-ը, որի ժամանակ ցնծությամբ նշում ենք թուրքական լծից Հունաստանի ազատագրումը: Հոկտեմբերի 28-ին նշում ենք Օխին, որը ֆաշիզմին միասնականորեն ոչ ասելու օրն է: Հույների սիրած տոներից է Զատիկը: Այդ օրը հույները միմյանց նվերներ են տալիս: Զատկի գլխավոր կերակուրը խորոված ուլն է»,-ասաց ՀԿ նախագահը:

Մարտի 25-ը Հունաստանի անկախության օրն է: 1821թվականին այդ օրը Հունաստանն ազդարարեց իր անկախությունըՕսմանյան կայսրությունից: