«Եվրիմաժ» հիմնադրամին անդամակցելու համար Հայաստանը 63 միլիոն դրամ կվճարի

Եվրոպայի խորհրդի «Եվրիմաժ» մշակութային աջակցության հեղինակավոր հիմնադրամին անդամակցելու համար Հայաստանը 63 միլիոն դրամ կվճարի: Այս մասին լրագրողների հետ հանդիպման ընթացքում տեղեկացրեց ՀՀ մշակույթի նախարարի տեղակալ Արթուր Պողոսյանը:

«Հայաստանն այս տարվանից անդամակցում է «Եվրիմաժ»-ին`որպես 37-րդ անդամ: «Եվրիմաժ»-ը ֆինանսական աջակցություն է տրամադրում երեք ուղղություններով`համատեղ կինոարտադրություն, կինովարձույթ և կինոցուցադրություններ: Հայաստանը դեռևս 2006 թվականից ջանքեր էր գործադրում միանալու «Եվրիմաժ»-ին: Հիմնադրամի բյուջեն տարեկան կազմում է 25 միլիոն եվրո: Անդամակցելու համար Հայաստանը մոտ 63 միլիոն դրամ է վճարելու: Սա փոքր անդամավճար է` համեմատած այլ երկրների հետ, բայց այն հնարավորությունները, որոնք ստեղծվելու են, շատ ավելին են ֆինանսական առումով»,-«Արմենպրես»-ի փոխանցմամբ`շեշտեց Արթուր Պողոսյանը:

ՀՀ մշակույթի նախարարի տեղակալի խոսքով`սկսվում են Հայաստանի կազմակերպչական-իրավական աշխատանքները, որպեսզի մեր կինոարտադրողների ներկայացվելիք հայտերն ընդունվեն հիմնադրամի կողմից: Նրա տեղեկացմամբ`հիմնադրամի ֆինանսավորմանը ներկայացվող ֆիլմերը պետք է լինեն համատեղ արտադրության:

Եվրոպայի խորհրդի հայաստանյան գրասենյակի ղեկավար Նատալյա Վուտովան շնորհավորեց Հայաստանին` «Եվրիմաժ»-ի անդամ դառնալու կապակցությամբ: «Ուրախ եմ, որ Հայաստանը ևս հիմնադրամի մաս է կազմում: Եվրոպայի խորհուրդը նաև մշակութային կապն է կարևորում»,-շեշտեց նա:

«Եվրիմաժ»-ի հայաստանյան ներկայացուցիչ, «Ռեանիմանիա» անիմացիոն ֆիլմերի փառատոնի հիմնադիր Վրեժ Քասունին տեղեկացրեց, որ հիմնադրամը տարեկան ֆինանսավորման 15-20 տոկոսը հատկացնում է անիմացիոն ֆիլմերին:

«Սա մեզ համար մարտահրավեր է`կինոարտադրողների նոր սերունդ պատրաստելու և միջազգային կինոարտադրության չափանիշներով աշխատելու ուղղությամբ»,-շեշտեց Վրեժ Քասունին:

Ֆիլմերն ընտրվում են բաց մրցույթի միջոցով: Պարտադիր պայման է, որ նախագիծը ներկայացված լինի երկու երկրից` համատեղ արտադրության արտադրանք լինի: Աջակցության գումարը կազմում է մինչև  500 հազար եվրո:

«Եվրիմաժը» (Eurimages) հիմնադրվել է 1989 թվականին՝ որպես Եվրոպայի խորհրդի մշակութային աջակցության հիմնադրամ: Ներկայումս կազմակերպությանն անդամագրված է 37 երկիր: Հայաստանը անդամակցում է կազմակերպությանը 2016 թվականից: