«Բլոկադա». թատերական պատմություն պատասխանատվության, հույսի և միասնականության մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Փետրվարի 25-ին և 26-ին Ստանիսլավսկի անվան թատրոնում տեղի կունենա «Բլոկադա» ներկայացման պրեմիերան։ Ներկայացման պրոդյուսերներն են Արմեն Պետրոսյանը և Սոֆիա Ղուլյանը։ Սցենարի հեղինակն է Անի Մաղաքյանը։ Դերասանական կազմում ընդգրկված են Լևոն Հարությունյանը, Մարջան Ավետիսյանը, Մարիամ Ալեքսանյանը, Վաչե Երիցյանը, Բորիս Մելքոնյանը և Էլեն Գևորգյանը։

Ներկայացումը նախատեսվում է ներկայացնել ոչ միայն Հայաստանում, այլև ունենալ մեծ հյուրախաղեր՝ թե՛ Ռուսաստանում, թե՛ Միացյալ Նահանգներում։ Tert.am Life-ը ներկա է եղել ստեղծագործական թիմի հետ հանդիպմանն ու պարզել առաջին մանրամասները:

«Բլոկադա» ներկայացման պրոդյուսեր Սոֆիա Ղուլյանը նշում է, որ այս նախագիծը պարզապես աշխատանք չէ, այլ մեծ անձնական պատասխանատվություն՝ պայմանավորված թեմայի բարդությամբ և զգայունությամբ։

Ներկայացման բեմադրող ռեժիսոր Սեդրակ Գոջամանյանի խոսքով՝ «Բլոկադա» ներկայացման հիմնական գաղափարը պատկանում է պրոդյուսեր Արմեն Պետրոսյանին։

«Մի գեղեցիկ առավոտ ես և Արմեն Պետրոսյանը մտքերի փոխանակման արդյունքում հասանք այն եզրակացության, որ արժե Արցախի բլոկադայի թեմայով ներկայացում անել։ Սկսեցինք քննարկել, թե ով կարող է գրել, ովքեր կարող են խաղալ, և պրոդյուսերական առումով Արմեն Պետրոսյանը հրավիրեց նաև Սոֆիա Ղուլյանին՝ որպես համապրոդյուսեր, և այդպես սկսվեց այս ամենը», -նշեց ներկայացման բեմադրող ռեժիսորը։

Ներկայացումը պատմում է Արցախի բլոկադայի ժամանակաշրջանի մասին՝ ներկայացնելով արցախցի և երևանցի երկու ընտանիքների համատեղ պատմությունը։ Պիեսի հեղինակը Անի Մաղաքյանն է, ում հետ ստեղծագործական խումբը առաջին անգամ է համագործակցում։

Սեդրակ Գոջամանյանը հավելում է, որ նման նախագծերում ամեն ինչ ստեղծվում է զրոյից, և ստեղծագործական կազմը ձևավորվում է զուգահեռ՝ սցենարիստից մինչև դերասանական ընտրություն։

«Ներկայացման բեմանկարիչն է Գարեգին Եվանգուլյանը, աֆիշայի դիզայնի հեղինակը՝ Արտեմ Ղարիբյանը։ Երաժշտությունը գրվում է հատուկ այս ներկայացման համար և դեռ կմնա անակնկալ. այն կունենա նաև երգ և տեսահոլովակ»,- նշեց բեմադրող ռեժիսորը:

Սցենարի հեղինակ Անի Մաղաքյանը նշում է, որ սկզբից ամենամեծ դժվարությունը թեմայի պատասխանատվությունն էր։

«Առաջինը վախն էր՝ հանկարծ սահմանը չհատենք, հանկարծ սխալ մեսիջներ չփոխանցենք։ Բայց համատեղ աշխատանքի շնորհիվ, կարծում եմ, շատ լավ արդյունք ստացանք։ Ինձ համար սա շատ բարդ էր, որովհետև սա լինելու է իմ առաջին պիեսը, որը բեմ կբարձրանա, և թատրոնի հետ իմ առաջին առնչությունն է որպես հեղինակ, այն էլ այսքան բարդ թեմայով»,- նշեց նա՝ հավելելով, որ հանդիսատեսի գնահատականը կլսեն արդեն փետրվարին։

Դերասան Վաչե Երիցյանի խոսքով՝ նման թեմայի շուրջ աշխատելը և՛ հաճելի է, և՛ բարդ։

«Թեման այնպիսին է, որ պետք է շատ նուրբ ու շատ ճիշտ մոտենալ, որովհետև դա մեզ հետ է գրեթե ամեն օր, ամեն ժամ։ Մենք ներկայացնում ենք ժամ ու կեսանոց մի ամբողջ պատմություն և պետք է դրա մեջ ապրենք։ Մենք փորձում ենք պատասխանատու մոտենալ, որ հանկարծ նրբության սահմանը չանցնենք, քիչ կամ շատ չտանք», -նշեց դերասանը։

Դերասանուհի Էլեն Գևորգյանն էլ ընդգծեց, որ մեծ ուրախությամբ է մասնակցում նախագծին, թեև այն ծանր ու պարտավորեցնող է՝ թեմայի առումով։

Ներկայացման պատմությունը մասամբ իրական է։ Արցախի մի ընտանիք, ճակատագրի բերումով, հյուրընկալվում է երևանյան ընտանիքում, և հենց այդ ընթացքում սկսվում է բլոկադան։ Երկու, թվում է թե տարբեր աշխարհներ, ամբողջ աշխարհից կտրված, ստիպված են գոյատևել մեկ տան մեջ՝ ապրելով անորոշության, հույսի և սպասման պայմաններում։

Ներկայացման առանցքային գաղափարն այն է, որ հայը, անկախ բնակության վայրից, բարբառից կամ այլ տարբեր հատկանիշներից, չպետք է իր տեսակով տարանջատում դնի իր և մյուս հայի միջև։

«Բլոկադա» ներկայացումն ավարտվում է այն պահին, երբ Արցախում ավարտվում է բլոկադան։

Հետևեք մեզ՝ այստեղ