Դավութօղլուն նախարարների խորհուրդ է հրավիրել. սպասվում է նրա հրաժարականը

Թուրքիայի վարչապետ Ահմեդ Դավութօղլուն հունիսի 7-ին կայացած խորհրդարանական ընտրությունների արդյունքները գնահատելու համար հրավիրել է նախարարների խորհուրդ: Այս մասին տեղեկացնում է թուրքական «Միլլիեթ» պարբերականը:

Նախատեսվում է, որ ըստ նախատեսված կարգի Դավութօղլուն հունիսի 8-ին կամ 9-ին նախագահ Ռեջեփ Թայիփ Էրդողանին կներկայացնի իր հրաժարականը, իսկ վերջինս էլ թույլ կտա նրան մնալ վարչապետի պաշտոնակատարի դերում նախքան նոր կառավարություն կազմելը:

Նոր կառավարություն կազմելու աշխատանքները կսկսվեն ընտրությունների վերջնական արդյունքների հայտարարումից հետո: Թուրքական պաշտոնաթերթում դրանց հրապարակումից 5 օր անց նոր խորհրդարանն առաջին նիստը կանցկացնի, որում պատգամավորները երդում կտան: Երդման արարողությունից հետո Էրդողանն ամենայն հավանակությամբ հենց Դավութօղլուին կհանձնարարի նոր կառավարություն կազմել:

Սահմանադրության համաձայն` եթե նախագահի կողմից վստահված անձը չի կարողանում 15 օրվա ընթացքում կառավարություն կազմել, ապա իր այդ գործառույթները վերադարձնում է նախագահին: Սահմանադրությունը նախատեսում է նաև, որ եթե նախագահի կողմից առաջին հանձնարակականը տալուց 45 օր հետո կառավարություն չի կազմվում, երեք ամսվա ընթացքում նոր ընտրություններ են հրավիրվում:

Թուրքիայի խորհրդարանական 25-րդ ընտրությունների արդյունքում իշխող «Արդարություն և զարգացում» կուսակցությունը ստացել է ձայների 40,85 տոկոսը (258 պատգամավոր)` նախորդ ընտրությունների 49,83 տոկոսի փոխարեն: Իշխանության ղեկին լինելու 13 տարիներից հետո առաջին անգամ ԱԶԿ-ն կորցրել է միակուսակական կառավարություն կազմելու, ինչպես նաև իր ուժերով սահմանադրական բարեփոխումներ իրականացնելու հնարավորությունը: Այժմ անհրաժեշտ է, որ այն կոալիցիոն կառավարություն կազմի ընտված կուսակցություններից որևէ մեկի հետ:

Քվեատուփերի 99,98 տոկոսի արդյունքներով Հանրապետական ժողովրդական կուսակցությունը ստացել է ձայների 24,96 տոկոսը (132 պատգամավոր), «Ազգայնական շարժում» կուսակցությունը` 16,28 տոկոսը (80 պատգամավոր) և քրդական Ժողովուրդների դեմոկրատական կուսակցություն` 13,11 տոկոսը (80 պատգամավոր): Ընտրություններին երկրի ներսում մասնակցել է ընտրելու հնարավորություն ունեցող քաղաքացիների 86,62 տոկոսը: Անվավեր է ճանաչվել ավելի քան մեկ միլիոն քվեաթերթիկ: