«Բարձրացա բեմ, ոտքերս սկսեցին դողալ». Արթուր Գրիգորյանի երգի պրեմիերան՝ «Տարվա երգ 2025»-ի բեմում. տարվա լավագույններն ու հույզերը ետնաբեմում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կարեն Դեմիրճյանի անվան մարզահամերգային համալիրում հայտնի դարձան տարվա լավագույնները. կայացավ «Տարվա երգ» 2025 մրցանակաբաշխությունը: 

Տարվա հիթերն ընտրվում են յութուբում բազմաթիվ կամ գոնե մի քանի միլիոն դիտումների արդյունքում, ինչպես նաև սահմանվում են հատուկ մրցանակներ և հրավիրվում հատուկ հյուրեր: Այս տարի «Տարվա երգ» մրցանակաբաշխության հատուկ հյուրերից էր վրացական հայտնի Nikos band-ը:

Tert.am Life-ը ներկա է եղել մրցանակաբաշխությանն ու ետնաբեմում զրուցել արտիստների հետ:

Երեկոյի ընթացքում առաջին անգամ հնչեց Արթուր Գրիգորյանի հեղինակած վերջին երգերից մեկը՝ «Սերը կիջնի», որը նա նվիրել էր երգչուհի Անահիտ Ադամյանին: Արթուր Գրիգորյանի ցանկությունն է եղել, որ այդ երգի խոսքերի հեղինակը լինի Ավետ Բարսեղյանը, իսկ գործիքավորումը հեղինակեն Կարեն և Սևակ երաժիշտները։

«Շատ էի հուզվում, իրականում շատ-շատ էի հուզվում... Որ բարձրացա բեմ, ոտքերս սկսեցին դողալ, շատ պատասխանատու էր, որովհետև  առաջին անգամ եմ երգում այս երգը, բացի այդ՝ այս երգը գրված է հատուկ իմ համար Արթուր Գրիգորյանի կողմից:

Նա հատուկ ինձ համար է գրել այս երգն ու ասում էր, որ ինձ պետք է լայն երգ, որովհետև ես լայն երգչուհի եմ, ու գրեց «Սերը կիջնի» երգը:

Շատ հաճելի միջոցառում է, բոլոր լավ ու տաղանդավոր մարդիկ հավաքվում են նույն տեղում ու հանդիսատեսը գալիս է վայելելու, դրանից ավելի սիրուն բան երևի չկա արտիստի համար»,- Tert.am Life-ի հետ զրույցում՝ երգի կատարումից հետո անկեղծացավ երգչուհի Անահիտ Ադամյանը:

Երգչուհի Սոնա Ռուբենյանն էլ նշեց, որ ինչպես 2024-ի վերջում էր պլանավորում, տարին երգառատ էր:

«2026-ին կարծում եմ, որ ավելի շատ եմ աշխատելու, չնայած օր չի եղել, որ չաշխատեմ 2025 թվականին, բայց մյուս տարի ավելի խիստ ռեժիմ եմ դնել իմ վրա»,- նշեց Սոնա Ռուբենյանը:

 Երգիչ Միհրան Ծառուկյանն ու Արփի Գաբրիելյանն էլ նշեցին, որ ամեն տարի մասնակցում են այս մրցանակաբաշխությանն ու անչափ կարևորում են կազմակերպիչների աշխատանքը:

«Շատ-շատ ենք կարևորում հենց «Տարվա երգ»-ը և շատ բարձր մակարդակով է արվում այն, ինչ արվում է, ինչը միայն ողջունելի է: Մեծ հաճույքով ենք մասնակցում ու բավականություն ենք ստանում»,- նշեց Միհրան Ծառուկյանը:  

Արփի Գաբրիելյանն էլ ընդգծեց, որ արտիստի համար գնահատված լինելը չափազանց կարևոր է:

«Այսպիսի մրցանակաբաշխություններ շատ քիչ են թվով ու որակով: «Տարվա երգ»-ը առաջին օրվանից պահել է իր նշաձողը ու մենք այսպես ասած՝ մշտակյացներն ենք այս մրցանակաբաշխության:

Շատ սիրում ենք բոլորին, ովքեր ներգրավված են այս մրցանակաբաշխության մեջ, այդ պատճառով էլ ամեն տարի մեծագույն սիրով գալիս ենք»,- ասաց Արփի Գաբրիելյանը:

Հետևեք մեզ՝ այստեղ