Կուբա ժամանած Օբաման «պատմական հնարավորություն» է համարել իր այցը

ԱՄՆ-ի նախագահ Բարաք Օբաման, որը մարտի 20-ին ժամանել է Կուբա, «պատմական հնարավորություն» է համարել իր այցը, տեղեկացնում է «Արմենպրես»-ը՝ հղում անելով Սպիտակ տան մամուլի ծառայությանը:

«Սա պատմական այց է և պատմական հնարավորություն»,- հայտարարել է Օբաման Հավանայում ԱՄՆ-ի դեսպանատան աշխատակիցների հետ կայացած հանդիպմանը՝ նկատի ունենալով երկու երկրների հարաբերությունների նորմալացումը: Նախագահը նաև նշել է, որ Կուբա իր այցը «միայն առաջին քայլն է» այդ երկրի հետ նոր հարաբերություններում:

ԱՄՆ-ն և Կուբան 2014 թվականի դեկտեմբերին հայտարարել են հարաբերությունների նորմալացման մասին, իսկ անցյալ տարվա հուլիսին վերականգնել են դիվանագիտական հարաբերությունները, որոնք խզվել էին հիսուն տարի առաջ Կուբայում տեղի ունեցած հեղափոխությունից հետո:

Դեսպանատան աշխատակիցների հետ հանդիպումն Օբամայի առաջին միջոցառումն է դարձել Հավանա ժամանելուց հետո: Դրանից հետո նա, չնայած անձրևին, ոչ մեծ զբոսանք է կատարել քաղաքի կենտրոնական շրջանում:

Օբաման և նրան ուղեկցող անձինք այցելել են նաև Հավանայի Մայր տաճար, որտեղ նրանց դիմավորել է Կուբայի կաթոլիկ եկեղեցու կարդինալ Հայմե Օրտեգան:

Բարաք Օբաման Կուբա է ժամանել մարտի 20-ին: Ուղևորությունն ամերիկյան պետության ղեկավարի առաջին այցն է դարձել վերջին 88 տարվա ընթացքում այն բանից հետո, երբ 1928 թվականին ԱՄՆ-ի հանրապետական նախագահ Կալվին Կուլիջը մասնակցեց Ամերիկյան պետությունների ամենամյա միջազգային խորհրդաժողովի աշխատանքին: Օբամային ուղեկցում են նրա կինը և երկու դուստրերը, հաղորդել է ՌԻԱ Նովոստին: