Սերգեյ Յուրանի գլխավորությամբ «Միկա»-ն տարավ երկրորդ հաղթանակը

Ֆուտբոլի Հայաստանի առաջնության 18-րդ տուրի շրջանակում մարտի 19-ին Երևանի «Միկա»-ն սեփական հարկի տակ 2:0 հաշվով առավելության հասավ «Գանձասար Կապան»-ի նկատմամբ: Ինչպես հաղորդում է «Արմենպրես»-ը, տանտերերին առաջին կեսի 42-րդ րոպեին առաջ մղեց Սերգեյ Շումիլինը: Խորքից փոխանցումից հետո հյուրերի պաշտպանական գծում խառնաշփոթ առաջացավ, ինչից օգտվեց Գորելաշվիլին ու լավ փոխանցում կատարեց դարպասի դիմաց գտնվող Շումիլինին, ով պարզ իրավիճակում չվիրպեց: Այնուհետև հյուրերը երկրորդ կեսում փորձեր կատարեցին հավասարեցնելու հաշիվը, սակայն լուրջ գոլային պահեր երևանցիների դարպասի մոտ ստեղծել չհաջողվեց:

Ի տարբերություն հյուրերի՝ «Միկա»-ն կարողացավ երկրորդ գնդակն ուղարկել մրցակցի դարպասը: Աչքի ընկավ Գորելաշվիլին: Տուգանայինի խաղարկումից հետո գնդակը ետ մղվեց դարպասապահի կողմից, և այն հայտնվեց մոտ 15 մետր հեռավորության վրա գտնվող վրացի ֆուտբոլիստի մոտ, ով գեղեցիկ հարվածով գրավեց դարպասի աջ անկյունը:

Այս հաղթանակից հետո «Միկա»-ն վաստակեց 21 միավորով և բարձրացավ մրցաշարային աղյուսակի 6-րդ տեղ: Ռուս մասնագետ Սերգեյ Յուրանի գլխավորությամբ սա «Միկա»-ի երկրորդ հաղթանակն է: Նախորդ տուրում երևանցիները հաղթանակ էին տարել «Շիրակ»-ի նկատմամբ:

Մարտի 20-ին կկայանան 18-րդ տուրի ևս երկու հանդիպումներ՝ «Բանանց»-ը կընդունի «Արարատ»-ին, իսկ «Փյունիկ»-ը՝ «Շիրակ»-ին: